मध्य रेल्वेची वाहतूक विस्कळीत

मटा ऑनलाइन वृत्त । मुंबई

मध्य रेल्वेवरील कळवा स्थानकाजवळ सिग्नल यंत्रणेत बिघाड झाल्यानं मध्य रेल्वेची वाहतूक विस्कळीत झाली आहे. आधीच मेगा ब्लॉकमुळे रेल्वेसेवा रखडलेली असल्याने त्यातच झालेल्या या बिघाडामुळे मध्य रेल्वेचा पार बोऱ्या वाजला आहे. प्रवाशांच्या हालाला त्यामुळे पारावार उरलेला नाही.

पारसिक बोगदा आणि कळवा येथे सिग्नल यंत्रणेत बिघाड झाला आहे. या बिघाडामुळे जलद आणि धीम्या अशा दोन्ही मार्गांवरील वाहतुकीवर परिणाम झाला आहे. परिणामी कल्याण, डोंबिवली, दिवा आणि कळवा स्थानकांत प्रवाशांची मोठ्या प्रमाणात गर्दी झाली आहे. मध्य रेल्वेच्या मेन लाइनवर दुपारी ४ वाजेपर्यंत मेगाब्लॉक आहे. यामुळे मेन लाइनच्या अप स्लो मार्गावर कल्याण ते ठाणे स्थानकादरम्यानच्या वाहतुकीवर सकाळपासूनच परिणाम झाला होता. त्यात या सिग्नल बिघाडामुळे भर पडली आहे.