पुष्पा पागधरे यांना लता मंगेशकर पुरस्कार

मटा ऑनलाइन वृत्त । मुंबई

'इतनी शक्ती हमे देना दाता... मन का विश्वास कमजोर हो ना', ही प्रार्थना आपल्या सुरेल स्वरांनी अजरामर करणाऱ्या ज्येष्ठ गायिका पुष्पा पागधरे यांना प्रतिष्ठेचा लता मंगेशकर पुरस्कार जाहीर झाला आहे.

संगीत क्षेत्रात मोलाचे योगदान देणाऱ्या कलाकारास गानसम्राज्ञी लता मंगेशकर पुरस्काराने सन्मानित करण्यात येते. लतादीदींच्या वाढदिवसाचं औचित्य साधून आज राज्य सरकारनं त्यांच्या नावाच्या पुरस्काराची घोषणा केली. ५ लाख रोख, मानपत्र आणि सन्मानचिन्ह असं या पुरस्काराचं स्वरूप आहे.

वडील जनार्दन चामरे यांच्यासोबत भजनाचे कार्यक्रम करता-करता गाण्याचं बाळकडू मिळालेल्या पुष्पाताईंचा आवाज आकाशवाणीवरून घराघरात पोहोचला आणि मग विविध भाषांमधील सिनेमांत एकापेक्षा एक सरस गाणी गाऊन त्यांनी संगीतप्रेमींच्या मनातही स्थान मिळवलं. ‘अहो राया मला पावसात नेऊ नका’, 'नको नको रे पावसा असा धिंगणा अवेळी’, ‘नाच गं घुमा कशी मी नाचू’ ही त्यांची गाणी आजही रसिकांच्या ओठांवर रुंजी घालतात. पुष्पाताईंना सगळ्यात आधी आवाज कसा लावायचा, हे शिकवलं ते आर. डी. बेंद्रे यांनी. त्यांच्याकडून त्या शास्त्रीय संगीत आणि राग शिकल्या. पण, तेवढ्यावर थांबल्या नाही. पुढच्या वाटचालीत जे - जे मान्यवर भेटले, त्यांना पुष्पाताईंनी गुरू केलं. अब्दुल रहेमान खाँसाहेब यांच्याकडे त्यांनी गझल, ठुमरीचे धडे गिरविले, आर. एन. पराडकर यांच्याकडे भजनं, भक्तिगीतं शिकल्या, तर गोविंद पोवळे यांच्याकडे त्यांनी सुमग संगीताचं शिक्षण घेतलं.

या भक्कम पायामुळे पुष्पा पागधरे यांचं गाणं एका वेगळ्या उंचीवर पोहोचलं. प्रसिद्ध संगीतकार राम कदम यांनी त्यांना प्रथम 'देवा तुझी सोन्याची जेजुरी' या चित्रपटात गायनाची संधी दिली. त्यानंतर त्यांची अनेक लोकगीतं गाजली. त्यांनी मराठीसोबत हिंदी, भोजपुरी, ओडिया, बंगाली,मारवाडी, हरियाणवी, पंजाबी, गुजराती आणि आसामी भाषांमध्येही त्यांनी गाणी गायली आहेत. सर्वोत्कृष्ट पार्श्वगायनासाठी राज्य सरकारतर्फे त्यांचा दोनदा सन्मान करण्यात आलाय. आता गानसम्राज्ञी लता मंगेशकर पुरस्कारामुळे त्यांच्या शिरपेचात मानाचा तुरा खोवला गेला आहे.

पुष्पाताईंआधी माणिक वर्मा, श्रीनिवास खळे, गजानन वाटवे, दत्ता डावजेकर, पं.जितेंद्र अभिषेकी, पं.हदयनाथ मंगेशकर, ज्योत्स्ना भोळे, आशा भोसले, अनिल विश्वास, सुधीर फडके, प्यारेलाल शर्मा,रवींद्र जैन, स्नेहल भाटकर, मन्ना डे, जयमाला शिलेदार, खय्याम, महेंद्र कपूर, सुमन कल्याणपूर, सुलोचना चव्हाण, यशवंत देव, आनंदजी शहा, अशोक पत्की, कृष्णा कल्ले, प्रभाकर जोग, उत्तम ब्रिदपाल सिंग यांना या पुरस्कारानं गौरवण्यात आलंय.