शीव उड्डाणपुलासाठी दुसरा ब्लॉक

मुंबई : शीव उड्डाणपुलाचे बेअरिंग बदलण्यासाठी दुसऱ्या टप्प्यातील काम गुरुवारी, २७ फेब्रुवारी रोजी सायंकाळी ६ वाजता सुरू होणार आहे. हे काम पूर्ण होईपर्यंत सोमवार, २ मार्च सकाळी ७पर्यंत उड्डाणपुलावरील वाहतूक पूर्णत: बंद राहील.

पहिल्या ट्रॅफिक ब्लॉकमध्ये उड्डाणपुलाचे ३२ बेअरिंग बदलण्यात आले. काही तांत्रिक कारणास्तव हा ब्लॉक २४ तासांच्या कालावधीसाठी वाढवण्यात आला होता. परिणामी २० ते २४ फेब्रुवारी या कालावधीतील दुसरा ब्लॉक रद्द करण्याचा निर्णय एमएसआरडीसीने घेतला होता. मुंबई वाहतूक विभागाकडून एमएसआरडीसीने एकूण आठ ट्रॅफिक ब्लॉक मंजूर करून घेतले आहेत. त्यानुसार रद्द केलेला दुसरा ब्लॉक पुढील वेळापत्रकात जोडून घेतला जाण्याची शक्यता वर्तवली जात आहे.