​ ‘सायन-पनवेल’ रडारवर

महामार्गाच्या कामात अनियमितता आढळल्याचा लोकलेखा समितीचा ठपका

म. टा. विशेष प्रतिनिधी, मुंबई

सायन-पनवेल महामार्गाच्या २००९ साली झालेल्या कामात मोठ्या प्रमाणावर घोटाळा झाला असून यासाठी राबविण्यात आलेल्या कार्यपद्धतीवर लोकलेखा समितीने ताशेरे ओढले आहेत. महामार्गाची जाडी, सर्व्हिस रोडची लांबी, संरक्षक भिंतीची उभारणी या सर्वच कामात अनियमितता आढळली असून याप्रकरणाची चौकशी लाचलुचपत प्रतिबंधक विभागाकडून सुरू आहे. याप्रकरणी दोषींवर कारवाई करून कारवाईचा अहवाल तीन महिन्यांत सादर करावा, असे निर्देश लोकलेखा समितीने दिले आहेत.

विधानसभेत बुधवारी लोकलेखा समितीचा अहवाल सादर करण्यात आला. बांधा-वापरा-हस्तांतर करा (बीओटी) या तत्त्वावर बांधण्यात आलेल्या या महामार्गाच्या नवीन कामामुळे १७२.८० कोटींचा खर्च वाढला असून निविदा प्रक्रियेत १३.७८ कोटी रुपयांची दोन कामे वगळण्यात आली आहेत. तसेच संरक्षक भिंतीच्या बांधकामाचा कोणताही तपशिल न देता, ६५ कोटी रुपये ठरविण्यात आल्याचा ठपका लोकलेखा समितीच्या अहवालात ठेवण्यात आला आहे. कंत्राटदाराकडून १४५.७१ कोटींचे करदायित्व आवश्यक असताना, त्याने कर भरला किंवा नाही याची पडताळणी तत्कालीन सरकारकडून करण्यात आली नाही, असा आक्षेप ठेवण्यात आला आहे.

उर्वरित काम सरकारने करावीत

या अनियमिततेमुळे रस्त्याच्या कामाचा खोळंबा होऊ नये, यासाठी सरकारने स्वखर्चाने उर्वरित काम पूर्ण करावे व त्याची भरपाई कंत्राटदाराकडून घ्यावी, असे निर्देश लोकलेखा समितीने दिले आहेत.

खड्ड्यांच्या तक्रारीसाठी वेबसाइट सुरू करा!

सार्वजनिक बांधकाम विभागाच्या अंतर्गत रस्त्याच्या खड्ड्यांबाबत येणाऱ्या तक्रारीसाठी एक वेबसाइट सुरू करण्याचे निर्देश लोकलेखा समितीने दिले आहेत. यामुळे लोकांकडून येणाऱ्या सूचना व तक्रारी सरकारच्या निदर्शनास येतील. या तक्रारींची सरकारने गांभीर्याने दखल घेऊन दुरुस्तीची कामे कंत्राटदाराकडून करून घ्यावेत, अशी सूचनाही समितीने केली आहे.