बाबा मी पहिला आलो; दमानियांकडून आदित्य ठाकरेंची खिल्ली

मुंबई: निवडणुकीच्या राजकारणात उतरलेली ठाकरे घराण्यातील पहिली व्यक्ती म्हणून सध्या चर्चेत असलेले व शिवसेनेकडून 'सूर्ययान' असं कौतुक झालेले शिवसेनेचे युवा नेते आदित्य ठाकरे यांची सामाजिक कार्यकर्त्या अंजली दमानिया यांनी नाव न घेता जोरदार खिल्ली उडवली आहे. 'बाबा मी धावण्याच्या शर्यतीत पहिला आलो,' हा विनोद ट्विट करून दमानिया यांनी वरळी विधानसभा मतदारसंघातील संभाव्य निवडणूक लढतीवर भाष्य केलं आहे.

वाचा: शेवटी वाघ हा एकटाच जिंकत असतो: उद्धव ठाकरे

आदित्य ठाकरे हे दक्षिण मुंबईतील वरळी मतदारसंघातून निवडणूक लढवत आहेत. त्यांच्यासमोर राष्ट्रवादी काँग्रेसने सुरेश माने यांना मैदानात उतरवलं आहे. तर, 'मराठी बिग बॉस'फेम अभिजित बिचुकले यांनी त्यांना अपक्ष म्हणून आव्हान दिलं आहे. असं असलं तरी शिवसेनेनं आदित्य यांच्या विजयासाठी जोरदार मोर्चेबांधणी केली आहे. आजी-माजी आमदार दिवसरात्र आदित्य यांच्या प्रचारात मेहनत घेत आहेत. त्यातच मनसेनं उमेदवार न दिल्यामुळं मराठी मते फुटण्याचाही धोका कमी आहे. त्यामुळंत आदित्य यांचा विजय जवळपास निश्चित मानला जात आहे. हाच धागा पकडून दमानिया यांनी एक खोचक विनोद ट्विट केला आहे.

पाहा व्हिडिओ: उद्धव ठाकरेंनी मानले शिवसैनिकांचे आभार

वाचा: मी मॅच जिंकलेली आहे, माझी धावसंख्या ठरलेली आहे: उद्धव ठाकरे

'एक मुलगा आपल्या बाबांना शर्यतीत पहिला आल्याचं सांगतो. बाबा त्याला विचारतात, दुसरा आणि तिसरा कोणा आला? त्यावर कोणी नाही. मी एकटाच धावत होतो, असं मुलगा त्यांना सांगतो,' असा खरंतर हा विनोद आहे. मात्र, दमानिया यांनी आपल्या ट्विटमध्ये पुढं 'वरळी मतदारसंघात...' असं लिहून हा विनोद आदित्य ठाकरे यांच्यावर असल्याचं स्पष्टपणे सूचित केलं आहे. त्यांच्या या ट्विटची राजकीय वर्तुळात जोरदार चर्चा आहे.

वाचा: राज ठाकरे चौकशीला निघालेत की सत्यनारायण पूजेला? - दमानिया

वाचा: बारामती कायमची बंद ठेवा, कोणाला फरक पडतो- दमानिया