मध्यमवर्गीयांचा संमिश्र,
उच्चभ्रूंचा थंड प्रतिसाद
म. टा. खास प्रतिनिधी, मुंबई
झोपडपट्टी, मध्यमवर्गीय ते उच्चभ्रू वस्ती अशी ओळख असलेल्या दक्षिण मुंबईत मिश्र वस्तींप्रमाणे प्रतिसादही संमिश्र होता. मराठी, अमराठी आणि मुस्लिमबहुल भागामध्ये मतदारांचा प्रतिसाद चांगला होता. मात्र पेडर रोड, मलबार हिलसारख्या उच्चभ्रू वस्तींमध्ये थंड प्रतिसाद दिसला.
दक्षिण मुंबईतील कुलाबा, मुंबादेवी, मलबार हिल, भायखळा या मतदारसंघांत सुरुवातीला थंड प्रतिसाद दिसत होता. तासाभराने म्हणजेच आठनंतर हळूहळू मतदार मतदान केंद्रावर येऊ लागले. मध्यमवर्गीय वस्ती असलेल्या गिरगाव, ताडदेव, माझगाव, उमरखाडी, भायखळा, मोहम्मद अली रोड, पायधुनी, डोंगरी, नागपाडा या भागांत मतदारांच्या रांगा लागल्या होत्या. काही मतदार केंद्रांमध्ये चिखल असल्याने मतदारांना कसरत करावी लागत होती. मध्यमर्गीयांच्या वस्त्या तसेच झोपडपट्ट्यांमध्ये चौकाचौकांत विविध पक्षांचे कार्यकर्ते आपापल्या परिसरातील मतदारांच्या याद्या घेऊन त्यांना नावे शोधून देत होते. काही ठिकाणी तर हे कार्यकर्ते घरांमध्ये जाऊन मतदारांना आवाहन करताना दिसून आले. सकाळचा चहा-नाश्ता, दुपारचे जेवण तसेच कार्यकर्त्यांबरोबरच मतदारांसाठी पिण्याच्या पाण्याची व्यवस्था करण्यात आली होती. याचाच परिणाम मध्यवर्गीय परिसरात मतदानाला चांगला प्रतिसाद दिसला.
दुसरीकडे उच्चभ्रू वस्तीमध्ये मतदान केंद्रावर शुकशुकाट पाहायला मिळाला. पेडर रोड, केम्स कॉर्नर, बाबूलनाथ, मलबार हिल, वाळकेश्वर, मुंबादेवी, कुलाबा या परिसरातील मतदान केंद्रांवर मतदारांची तुरळक संख्या दिसली. विशेष म्हणजे पक्षाचे स्टॉलही म्हणावे तसे या भागांत दिसले नाही. सकाळी काही प्रमाणात मतदार येत होते, मात्र दुपारनंतर हा प्रतिसाद आणखी थंडावला.