दक्षिण मुंबईचे दर्शन ८५५ फुटांवरून!

म. टा. विशेष प्रतिनिधी, मुंबई

नरिमन पॉइंटच्या उंचच उंच इमारती, फेसाळता सी-फेस, मरीन ड्राइव्हचा क्वीन नेकलेस आणि गिरगाव चौपाटीवर उसळणाऱ्या लाटांचे विहंगम दर्शन डोळ्यात साठवून घेण्याची संधी मुंबईकरांना चालून आली आहे. दक्षिण मुंबईचे हे निसर्गसौंदर्य पाहाण्यासाठी मुंबई महापालिकेने मलबार हिलच्या हँगिंग गार्डन व कमला नेहरू पार्कजवळ एक 'व्ह्युइंग गॅलरी' उभारली आहे. डोळ्याचे पारणे फेडणारी ही निसर्गदृष्टी तब्बल २८५ मीटर (८५५ फूट) उंचीवरून टेलिस्कोपमधून मुंबईकरांना पाहता येईल.

मलबार हिल येथे उंचावर पालिकेच्या जल विभागाच्या मालकीची जागा असून त्याचा वापर गेल्या काही वर्षांपासून बंद करण्यात आला होता. या ठिकाणी प्रेक्षणीय 'व्ह्युइंग गॅलरी' बांधण्याची सूचना गिरगावचे तत्कालीन शिवसेना नगरसेवक सुरेंद्र बागलकर यांनी केली होती. तब्बल ८५५ फूट उंचावरील या गॅलरीतून मरिन ड्राइव्ह, गिरगाव चौपाटी परिसराचा नजारा पाहता येणार असल्याचे बागलकरांनी पालिकेला दिलेल्या प्रस्तावात म्हटले आहे. पालिकेने ही सूचना स्वीकारून दोन वर्षांत ही गॅलरी उभारली असून तिला दिवंगत ज्येष्ठ शिवसेना नेते प्रमोद नवलकर यांचे नाव दिले आहे. या गॅलरीचे उद्घाटन बुधवारी युवा सेनेचे प्रमुख आदित्य ठाकरे, वंदना नवलकर व महापौर विश्वनाथ महाडेश्वर यांच्या हस्ते करण्यात आले.

'गॅलरी'च्या चारमजली इमारतीत लिफ्ट, टेलिस्कोप, बायनाक्युलर, पाणी विभागाचा नियंत्रण कक्ष, कॉन्फरन्स हॉल, उद्यान ऑफिस नव्याने बांधण्यात आले आहे. या कामांसाठी ११ कोटींचा खर्च करण्यात आला आहे. गॅलरीच्या बांधकामासाठी मालाड स्टोनचा वापर करण्यात आला असून स्‍टील व मोझेक काचेचे संरक्षक कठडे उभारण्यात आले आहेत. गॅलरीला काचेची पारदर्शी लिफ्ट, फ्लड लाइट, अॅम्‍फी थिएटरची सुविधा करण्यात आली आहे.

अशी आहे 'व्ह्युइंग गॅलरी'

- बांधकामासाठी मालाड स्टोनचा वापर

- गिरगाव चौपाटीपासून नरिमन पॉइंटपर्यंतचे दृश्य दिसणार

- गॅलरीत एकावेळी ५० प्रेक्षकांना सोडण्यात येणार

- सुरक्षेसाठी सुमारे दीड मीटर काचेचे तावदान

- सीसीटीव्ही कॅमेऱ्यांची नजर हेरणार

- दिव्यांगांसाठी लिफ्ट आणि खास रॅम्प