मुंबईबाहेर जाण्याची देशमुख यांना परवानगी; विशेष सीबीआय, विशेष पीएमएलए न्यायालयाची मुभा

मुंबई : जामिनावर असलेले माजी गृहमंत्री व राष्ट्रवादी काँग्रेसचे नेते अनिल देशमुख यांना नागपूर व नवी दिल्लीत जाता यावे यासाठी चार आठवडे मुंबईबाहेर जाण्याची परवानगी विशेष सीबीआय व विशेष पीएमएलए न्यायालयाने त्यांना सोमवारी दिली.

भ्रष्टाचाराच्या आरोपाखाली सीबीआयने दाखल केलेला एफआयआर आणि भ्रष्टाचाराचे पैसे आपल्या नागपूरस्थित शिक्षणसंस्थेत वळवल्याच्या आरोपाखाली ईडीने दाखल केलेला मनी लाँड्रिंगचा गुन्हा या दोन्ही प्रकरणांत देशमुख यांना मुंबई उच्च न्यायालयाकडून जामीन मिळाला आहे. मात्र, जामिनाच्या आदेशांत उच्च न्यायालयाने देशमुख यांना अनेक अटी घातल्या असून न्यायालयाच्या परवानगीविना मुंबईबाहेर जायचे नाही, या अटीचाही त्यात समावेश आहे. त्यामुळे देशमुख यांनी अॅड. अनिकेत निकम व अॅड. इंदरपाल सिंग यांच्यामार्फत दोन्ही न्यायालयात अर्ज केले होते.

‘मी मूळचा नागपूरचा असल्याने आणि नागपूर जिल्ह्यातील विधानसभा मतदारसंघाचे प्रतिनिधित्व करत असल्याने काही कामांसाठी तिथे जाणे आवश्यक आहे. तसेच वकिलांची भेट घेऊन खटल्याबाबत सल्लामसलत करण्यासाठी नवी दिल्लीत जाण्याची आवश्यकता आहे’, असे नमूद करत देशमुख यांनी ही परवानगी मागितली होती.