पोलिओमुक्तीसाठी राज्यात विशेष लसीकरण

मुंबई : पोलिओच्या समूळ उच्चाटनासाठी राज्यात यावर्षी २८ जानेवारी व ११ मार्चला पोलिओ लसीकरणाची विशेष मोहीम राबविण्यात येणार आहे. याअंतर्गत शून्य ते पाच वर्षे वयोगटातील एक कोटी २१ लाख २९ हजार बालकांना डोस देण्याचे उद्दिष्ट आहे. त्यासाठी राज्यभरात ८५ हजार बूथ उभारण्यात येणार आहेत. रविवारी बालकांना पोलिओचा डोस पाजून घ्यावा, असे आवाहन आरोग्यमंत्री डॉ. दीपक सावंत यांनी केले आहे.

१९९५ पासून पोलिओ निर्मूलन विशेष मोहीम सुरू करण्यात आली. तेव्हापासून राज्यात दोन वेळा विशेष पल्स पोलिओ मोहीम राबविली जाते. पोलिओचे समूळ उच्चाटन होईपर्यंत ही मोहीम सुरू राहणार असल्याचे आरोग्यमंत्र्यांनी सांगितले. यावर्षी रविवारी २८ जानेवारीला ही मोहीम घेण्यात येणार आहे. त्यानंतर पुढील पाच दिवस सुमारे दोन कोटी ९० लाख ९० हजार घरांना भेटी देण्याचे नियोजन करण्यात आले आहे. त्याअंतर्गत घरोघरी जाऊन बालकांना डोस पाजण्यात येणार आहे.