मालेगाव बॉम्बस्फोटः समीर कुलकर्णीला जामीन

मटा ऑनलाइन वृत्त । मुंबई

मालेगावात २००८ मध्ये झालेल्या बॉम्बस्फोट प्रकरणी आरोपी समीर कुलकर्णीला विशेष एनआयए कोर्टाने आज जामीन मंजूर केला. कोर्टाने ५० हजार रुपयांच्या जातमुचलक्यावर कुलकर्णीला जामीन दिला.

समीर कुलकर्णी हा भोपाळचा आहे. तो एका छपाईच्या कारखान्यात काम करत होता. बॉम्बस्फोटासाठी त्याने रसायनांचा पुरवठा केला. तसंच बॉम्बस्फोटाचा कट रचण्यासाठी नाशिक आणि इंदूरमध्ये झालेल्या बैठकीत कुलकर्णीही उपस्थित होता, असा त्याच्यावर आरोप आहे. मालेगावातील बॉम्बस्फोटानंतर त्याला लगेचच अटक करण्यात आली होती.

मालेगाव बॉम्बस्फोट प्रकरणी यापूर्वी न्यायालयाने तिघांना जामीन दिला आहे. साध्वी प्रज्ञा सिंह, कर्नल प्रसाद पुरोहित आणि मेजर रमेश उपाध्याय यांना जामीन मंजूर झाला आहे. तब्बल नऊ वर्षानंतर यांना जामीन दिला गेला.

मालेगावमध्ये २९ सप्टेंबर २००८ ला बॉम्बस्फोट झाला होता. या स्फोटात सहा ठार तर १०० जण जखमी झाले होते. एका मोटरसायकलमध्ये हा बॉम्ब ठेवण्यात आला होता.