एसटींमध्ये आता व्हीटीएस प्रणाली

सुटण्याची आणि पोहोचण्याची वेळ समजणार;

पहिला प्रयोग साताऱ्यात

म. टा. खास प्रतिनिधी, मुंबई

एसटीची नेमकी स्थिती, गाडी सुटण्याची आणि पोहोचण्याची वेळ समजण्यासाठी एसटीने सर्व बसेसना 'व्हेईकल ट्रॅकिंग सिस्टिम' (व्हीटीएस) बसविण्याचा निर्णय घेतला आहे. याविषयीचा पहिला प्रयोग सातारा येथील ७०० एसटींवर करण्यात येणार आहे.

एसटीचे वेळापत्रक सुधारण्यासाठी एसटी महामंडळाकडून प्रयत्न सुरू आहेत. त्याचाच भाग म्हणून 'व्हीटीएस' प्रणालीवर काम सुरू आहे. त्या प्रणालीमुळे एसटीचे वेळापत्रक सुधारण्यास मदत होणार असल्याचा दावा केला जात आहे. याबाबतची, निविदा प्रक्रिया लवकरच सुरू होणार असल्याचे एसटी महामंडळाचे उपाध्यक्ष व व्यवस्थापकीय संचालक रणजित सिंह देओल यांनी सांगितली.

एखाद्या बसला पोहोचण्यास अनेक कारणांमुळे उशीर होतो. त्यामुळे एसटीची नेमकी स्थिती समजण्यासाठी मदत होणार आहे. व्हीटीएस प्रणाली बसविण्याचा पहिला प्रयोग सातारा विभागातील एसटीच्या जवळपास ७०० बसेसवर केला जाणार आहे. ही प्रणाली लागल्यास एसटी बसची सद्यस्थिती कळून त्याचा फायदा वेळापत्रक सुधारण्यासह मदत होण्याचा दावा केला जात आहे.