कांद्रेभुरे-सरावली रस्त्याच्या कामात दिरंगाई, विद्यार्थ्यांचे शैक्षणिक नुकसान
० शंभराहून अधिक विद्यार्थ्यांना मोठा फटका
० शाळा-कॉलेजांत पोहचणे झाले जिकीरीचे
म. टा. वृत्तसेवा, पालघर
पालघर तालुक्यातील सफाळे पश्चिम भागात असलेल्या कांद्रेभुरे-सरावली गावाच्या रस्त्याचे काम गेल्या तीन महिन्यांपासून अतिशय संथगतीने सुरू आहे. परिणामी रस्ता अरुंद झाल्याने गेल्या दहा दिवसांपासून या मार्गावर एसटी सेवा बंद असून मिळेल त्या वाहनाने, अव्वाच्या सव्वा पैसे मोजून विद्यार्थ्यांना प्रवास करावा लागत आहे. नुकत्याच बारावीच्या परीक्षा सुरू झाल्या असून एसटी बंद असल्यामुळे ऐन परीक्षेच्या दिवसांत विद्यार्थ्यांचे मोठे शैक्षणिक नुकसान होत आहे.
सफाळे परिसरातील सर्वाधिक वर्दळीचा कांद्रेभुरे-सरावली हा रस्ता चार ते पाच किमी लांबीचा असून त्यासाठी मुख्यमंत्री सडक योजनेतून निधी देण्यात आला आहे. या रस्त्यावर सरावली येथे मोऱ्या बांधण्याचे काम तब्बल एक महिन्यापासून सुरू आहे. मात्र या कामात ठेकेदाराकडून दिरंगाई होत आहे. या ठेकेदाराने रस्त्याचे काम अर्धवट केल्याने एसटी व इतर वाहने या मार्गावरील गावापर्यंत येत नाहीत. त्यामुळे येथील विद्यार्थी आणि नागरिकांना नाहक त्रास सहन करावा लागत आहे.
याबाबत मुख्यमंत्री सडक योजनेतील शाखा अभियंता जी. पी. पाटील यांच्याशी संपर्क साधला असता, एसटी चालू राहील यासाठी संबंधित ठेकेदाराला सूचना देण्यात येतील, असे सांगितले.
एसटीसेवा नसल्याने या रस्त्यावरून दररोज शंभराहून अधिक शाळा-कॉलेजांचे विद्यार्थी जीवाचा आटापिटा करून प्रवास करत आहेत. त्यांना मिळेल त्या वाहनाने प्रवास करावा लागत आहे. एसटी सेवा ऐन बारावीच्या परीक्षेच्या दरम्यान बंद झाल्याने विद्यार्थ्यांना शाळेत सोडण्यासाठी पालकांना इतर कामे सोडून मुलांना शाळेत सोडावे लागत आहे. त्यामुळे रस्त्याच्या कामातील दिरंगाईमुळे पालकांच्या मनात रोष निर्माण झाला आहे.
....................................
कांद्रेभुरे ते सरावली रस्त्याचे काम अत्यंत संथगतीने चालू असून त्याचा नाहक त्रास विद्यार्थी व नागरिकांना होत आहे. बारावीची परीक्षा सुरू असून काही दिवसांतच दहावीची परीक्षा सुरू होणार आहे. त्यामुळे विद्यार्थ्यांचे शैक्षणिक नुकसान होत आहे. त्याला जबाबदार कोण? रस्त्यावर खडी असल्याने दुचाकी वाहने घसरून अपघात होण्याची शक्यता आहे. ठेकेदाराने या रस्त्याचे काम लक्ष देऊन जलदगतीने पूर्ण करावे.
- अशोक नाईक, ग्रामपंचायत सदस्य, सरावली
...................
कांद्रेभुरे -सरावली अरुंद रस्ता असल्यामुळे एसटी जाताना झाडांच्या फांद्या लागत आहेत. पर्यायी रस्ता अरुंद असल्याने एसटी या मार्गावरून जात नाही.
- बेहरे, आगार व्यवस्थापक, सफाळे
..............................
एखाद्या ठिकाणी पर्यायी रस्त्यावर मातीचा भराव टाकून तो चालू करावा, यासाठी ठेकेदाराला सूचना करण्यात येतील. काही ठिकाणी पर्यायी रस्ता बनवला आहे. रस्ता पूर्ण बंद होईल, असे आम्ही करत नाही. परंतु कुठे अडचण आली असेल, तर ठेकेदाराला सूचना देऊन एसटी सेवा चालू करण्याचा प्रयत्न करू.
- जी. पी. पाटील, इंजिनीअर, मुख्यमंत्री सडक योजना