​ एसटीचालकांचे बेमुदत उपोषण

मूळ विभागात बदली करण्याची मागणी

म. टा. खास प्रतिनिधी, मुंबई

नियम डावलून कोकणात नियुक्ती करण्यात आलेल्या एसटीच्या ७२७ चालकांनी बेमुदत उपोषण करण्याचा निर्णय घेतला आहे. मूळ विभागात बदली होत नसल्याच्या निषेधार्थ आझाद मैदानात ७ सप्टेंबरपासून हे आंदोलन करण्यात येणार आहे.

एसटीमध्ये कुठल्याही चतुर्थश्रेणी कर्मचाऱ्याची भरती करताना ज्या विभागासाठी भरती असेल त्याच विभागात नेमणुका देण्याची पद्धत आहे. परंतु एमकेसीएल या संस्थेतर्फे २०१२ मध्ये एसटी महामंडळात राज्यातील विविध विभागात भरती झालेल्या ७२७ चालकांना नियम डावलून कोकणात नेमण्यात आले आहे. परिवहन मंत्र्यांनी आदेश देऊनही या चालकांच्या बदल्या झालेल्या नाहीत. त्यामुळे महामंडळातील अधिकाऱ्यांच्या विरोधात ८ सप्टेंंबरपासून आझाद मैदान येथेे हे ७२७ चालक उपोषणाला बसणार आहेत. महाराष्ट्र एसटी कर्मचारी काँग्रेसचे अध्यक्ष आमदार भाई जगताप यांनी ही माहिती दिली. या संदर्भात, परिवहन मंत्री दिवाकर रावते यांच्यासोबत २२ मार्चला झालेल्या चर्चेमध्ये या ७२७चालकांना मूळ विभागात टप्प्याटप्याने बदल्या करून पाठविण्याचे आदेश देण्यात आले होते. परंतु त्याचे पालन झालेले नाही. अशा केवळ दोन चालकांच्या बदल्या झाल्याचे समजते.