एसटी कर्मचाऱ्यांचा बेमुदत संपाचा इशारा

मुंबई : एसटी महामंडळाच्या कर्मचाऱ्यांनी सेवाज्येष्ठतेनुसार पदनिहाय सातव्या वेतन आयोगातील वेतनश्रेणी, वेतननिश्चिती, सरकारी कर्मचाऱ्यांप्रमाणे वेतन मिळण्याच्या मागणीसाठी १७ ऑक्टोबरपासून बेमुदत संपाचा इशारा दिला आहे. महाराष्ट्र एसटी वर्कर्स काँग्रेस (इंटक), महाराष्ट्र एसटी कामगार संघटनेसह अन्य संघटनांच्या बुधवारी परळ येथे झालेल्या बैठकीत हा निर्णय घेण्यात आला.

एसटीतील कर्मचाऱ्यांना देशातील अन्य एसटी महामंडळ आणि राज्य सरकारी कर्मचाऱ्यांच्या तुलनेतही कमी वेतन आहे. अशा स्थितीत कर्मचाऱ्यांना सातवा वेतन आयोग लागू करण्याची प्रमुख मागणी करण्यात आली आहे. या मागणीसंदर्भात नुकतेच कर्मचाऱ्यांचे मत जाणून घेण्यासाठी मतदान घेण्यात आले होते. त्यात, ९९.९० टक्के कर्मचाऱ्यांनी सातव्या वेतन आयोगासाठी पाठिंबा दिला आहे.

कर्मचाऱ्यांच्या मागण्यांची पूर्तता करण्यासाठी संपाचा इशारा देण्यात आला आहे. या बैठकीला ‘इंटक’चे अध्यक्ष जयप्रकाश छाजेड, सरचिटणीस मुकेश तिगोटे, एसटी कामगार संघटनेचे अध्यक्ष संदीप शिंदे, हनुमंत ताटे आदी उपस्थित होते.