ऐन दिवाळीत एसटी कर्मचाऱ्यांची संपाची हाक

मटा ऑनलाइन वृत्त। मुंबई

ऐन दिवाळीच्या तोंडावर एसटी कर्मचाऱ्यांनी संपाची हाक दिली आहे. सातवा वेतन आयोग लागू करण्याच्या मागणीसह इतर अनेक मागण्यांसाठी मंगळवार १७ ऑक्टोबरपासून एसटी कर्मचारी संपावर जाणार आहेत. राज्य सरकारने या इशाऱ्याची दखल घेतली असून, 'दिवाळी सणासाठी आपण संप करू नये, आपला हक्क मागण्याचा कर्मचाऱ्यांचा अधिकार आपल्याला मान्य आहे, परंतु, दिवाळीचा सण असल्याने आपण संघर्ष करू नये, कामगारांच्या हितासाठी नंतर अवश्य चर्चा करू', अशा शब्दांत परिवहन मंत्री दिवाकर रावते यांनी संप मागे घेण्याची विनंती केली आहे.

एसटी कर्मचाऱ्यांना सातवा वेतन आयोग लागू करावा या प्रमुख मागणीसह पदनिहाय वेतनश्रेणी द्यावी आणि जोपर्यंत कर्मचाऱ्यांच्या वेतनाबाबत सुधारित करार होत नाही तो पर्यंत कर्मचाऱ्यांना २५ टक्के हंगामी वाढ देण्यात यावी अशा प्रमुख मागण्या कर्मचाऱ्यांनी केल्या आहेत. कर्मचाऱ्यांच्या या मागण्या योग्य असल्याचे म्हणत राज्यातील काही आमदार आणि खासदारांनीही मुख्यमंत्र्यांकडे कर्मचाऱ्यांच्या मागण्या मान्य करण्याची विनंती केली आहे.



राज्यात एसटी कर्मचाऱ्यांची संख्या १ लाख ७ हजार इतकी आहे, तर एसटी बसगाड्यांची संख्या १७ हजार इतकी आहे. राज्यात एकूण २५८ डेपो असून ३१ विभागीय कार्यालये आहेत.