मुंबई: शिवसेना पक्षप्रमुख उद्धव ठाकरे थोड्याच वेळात शिवतीर्थावर मुख्यमंत्रिपदाची शपथ घेणार आहेत. मुख्यमंत्रिपदाची शपथ घेणारे ठाकरे घराण्यातील उद्धव ठाकरे हे पहिलेच असल्याने हा ऐतिहासिक सोहळा पाहण्यासाठी शिवतीर्थावर तुफान गर्दी लोटली आहे. 'कोण आला रे कोण आला, शिवसेनेचा वाघ आला', 'जय भवानी, जय शिवाजी', 'आवाज कुणाचा, शिवसेनेचा' असा जयघोष करत हजारो शिवसैनिक कुटुंबकबिल्यासह शिवतीर्थावर धडकले आहेत. त्यामुळे संपूर्ण दादर परिसर गर्दीने फुलून गेला आहे.
आज सायंकाळी ६ वाजून ४० मिनिटांनी शिवसेना पक्षप्रमुख उद्धव ठाकरे महाराष्ट्राचे १९वे मुख्यमंत्री म्हणून शपथ घेणार आहेत. या ऐतिहासिक शपथविधी सोहळ्यासाठी शिवतीर्थावर खास स्टेज तयार करण्यात आला आहे. सुप्रसिद्ध कला-दिग्दर्शक नितीन चंद्रकांत देसाई यांच्या मार्गदर्शनाखाली हे व्यासपीठ साकारण्यात आलं आहे. संपूर्ण व्यासपीठाला किल्ल्याचं स्वरूप देण्यात आलंय. छत्रपती शिवाजी महाराजांची सिंहासनाधिष्ठित आणि अश्वारुढ प्रतिमा व्यासपीठाच्या मध्यवर्ती ठिकाणी असणार आहे. तसंच, स्वराज्याची 'शिवमुद्रा' व्यासपीठावर कोरण्यात आली असून शिवशाही अवतरल्याचा भास निर्माण होत आहे.
शिवाजी पार्क परिसरात सुमारे ७० हजार आसनांची व्यवस्था करण्यात आली आहे. व्यासपीठावर ३०० मान्यवरांच्या बसण्याची सोय करण्यात आली आहे. संपूर्ण मैदानात शिवसेना, काँग्रेस आणि राष्ट्रवादीसह मित्रपक्षांचे झेंडे लावण्यात आल्याने संपूर्ण मैदान झेंड्यांनी फुलून गेलं आहे. कोणताही अनुचित प्रकार घडू नये याकरिता स्थानिक पोलिसांबरोबरच, सशस्त्र दल, राज्य राखीव पोलीस दल, दंगल नियंत्रण पथक, जलद प्रतिसाद पथक (क्यूआरटी), बॉम्बशोधक आणि नाशक पथक, मुंबई वाहतूक विभाग आणि जवळपास २ हजार अतिरिक्त पोलीस अधिकारी आणि कर्मचारी असा तैनात करण्यात आले आहेत. गर्दीवर सीसीटीव्हीद्वारे नजर ठेवण्यात येत आहे. तसेच साध्या वेशात पोलिसांचीही गस्त घालत असून वाहतूक शाखेकडून वाहतुकीचे नियमन करण्यात आले आहे.
उद्धवना शुभेच्छा देताना सोनिया म्हणाल्या...
आज दुपारी ४ वाजल्यापासून तिन्ही पक्षाचे कार्यकर्ते आणि सामान्य नागरिकांचे दादर स्टेशनवर उतरायला सुरू झाले. स्टेशनवर उतरताच या कार्यकर्त्यांनी घोषणा देण्यास सुरुवात केल्याने स्टेशन परिसर घोषणांनी दुमदुमून गेला. भगवे शेले आणि झेंडे उंचावतच शिवसैनिकांसह दोन्ही काँग्रेसच्या कार्यकर्त्यांनी शिवतीर्थाच्या दिशेने कूच केली. शिवसेना भवनजवळ येताच शिवसैनिक 'शिवसेना प्रमुख बाळासाहेब ठाकरे जिंदाबाद'च्या घोषणा दिल्या. 'उद्धव ठाकरे आगे बढो, हम तुम्हारे साथ है', आणि 'कोण आला रे कोण आला, शिवसेनेचा वाघ आला' आदी घोषणा यावेळी देण्यात येत होत्या. शिवतीर्थावर येणाऱ्यांमध्ये तरुण-तरुणींचा आणि महिलांचा मोठा सहभाग होता. अनेक लोक बस आणि कारने शिवतिर्थावर आले.
ठाकरे सरकर;पहिल्याच कॅबिनेटमध्ये मोठा निर्णय?
शिवसेना भवनाला रोषणाई
उद्धव ठाकरे यांचा मुख्यमंत्री म्हणून शपथविधी सोहळा होणार असल्याने शिवसेना भवनाला रोषणाई करण्यात आली होती. सायंकाळी रोषणाईमुळे संपूर्ण सेना भवन उजळून निघालं होतं. येणारे लोक शिवसेना भवनासमोर थांबत होते. शिवसेना भवनासमोर ग्रुपने आणि कुटुंबासह सेल्फी फोटो घेत होते. घोषणाबाजी देत होते. वरिष्ठ नेत्यांना भेटून हस्तांदोलन करत होते. त्यामुळे शिवसेना भवन परिसरही गर्दीने फुलून गेला होता.
सांस्कृतिक कार्यक्रमाची मेजवानी
दरम्यान, शपथविधी सोहळ्यापूर्वी शिवतीर्थावर सांस्कृतिक कार्यक्रमाचं आयोजन केलं होतं. शाहीर नंदेश उमप यांनी छत्रपती शिवाजी महाराजांवरील पोवाडा सादर केला. त्यामुळे संपूर्ण वातावरणात चैतन्य संचारलं होतं.