आता प्रत्येक जिल्ह्यात गोवंश सेवा केंद्र?

मटा ऑनलाइन वृत्त । मुंबई

गोवंश हत्याबंदी लागू झाल्यापासून भाकड जनावरांचे काय करायचे हा प्रश्न शेतकऱ्यांपुढे आ वासून उभा आहे. पण आता राज्य सरकारनेच याबाबत पुढाकार घेण्याचे ठरवले आहे. राज्यात प्रत्येक जिल्ह्यात यासाठी गोशाळा उभारण्यात येणार असल्याचे समजते. तसा निर्णय मंत्रीमंडळ बैठकीत घेतला गेला असल्याची सूत्रांची माहिती आहे. गोसंवर्धन गोवंश सेवा केंद्र असे या गोशाळांचे नाव असेल.

सध्या राज्यात ५१८ खासगी गोशाळा आहेत. मात्र भाकड जनावरांची संख्या लक्षात घेता त्या पुरेशा नाहीत. म्हणून या जनावरांच्या संवर्धनासाठी ही केंद्रे सुरू करण्याचा राज्य सरकारचा विचार आहे आणि त्यादृष्टीने पावले उचलली जात आहेत. या योजनेसाठी एक कोटी रुपयांच्या निधीची तरतूदही राज्य सरकार करणार आहे.

या योजनेंतर्गत ज्या संस्था ३ वर्षांपासून गोशाळा चालवत आहेत, ज्यांच्याकडे किमान १५ एकर जमीन आहे, अशाच संस्था गोसंवर्धन केंद्रासाठी अर्ज करू शकणार आहेत. प्रत्येक जिल्ह्यासाठी अशा एका संस्थेची निवड होईल. अशा संस्थांची नोंदणी धर्मादाय आयुक्तांकडे केली जाणे बंधनकारक आहे.

याशिवाय बैलांच्या संख्येवर नियंत्रण आणण्यासाठी अमेरिकेत वापरण्यात येत असलेल्या सॉर्टेड सेक्स सीमेन तंत्रज्ञानाचा वापर करण्यात येणार असल्याचीही माहिती आहे. बैलांची संख्या मर्यादित ठेवून गायींची संख्या वाढवण्यावर यापुढील काळात भर दिला जाणार आहे. या तंत्रज्ञानाच्या माध्यमातून बैलाच्या वीर्यात केवळ एक्स क्रोमोझोम ठेवून कालवडीच्या पैदाशीला चालना दिली जाते. ही योजना प्रायोगिक तत्वावर राबवण्याचा राज्य सरकारचा विचार आहे.