मुंबईत पावसाचा कहर...

मुंबई : कोट्यवधी रुपये खर्चून केलेली नालेसफाई, पावसाच्या प्रत्येक थेंबाचा निचरा करण्याचा दावा करण्यात आलेले पम्पिंग स्टेशन दिमतीला असतानाही, पावसाने २६ जुलैची पुनरावृत्ती करीत मंगळवारी संपूर्ण मुंबई पुन्हा एकदा पाण्याखाली घातली आणि मुंबई बेहाल करून टाकली. या पावसाने मुंबईतील प्रत्येक रस्ता व गल्ल्यांना नदीचे स्वरूप आले होते. पूर्व आणि पश्चिम द्रुतगती महामार्गांसह सर्वच रस्त्यांवर वाहतुकीची अभूतपूर्व कोंडी झाली होती. रेल्वे सेवा, विमान उड्डाणांसह मुंबईतील सर्व वाहतूक बंद झाली होती. भरतीच्या उसळणाऱ्या लाटांचा तडाखा लक्षात घेऊन सुरक्षिततेचा उपाय म्हणून वांद्रे वरळी सी लिंक वाहतुकीसाठी बंद करण्यात आला होता. रेल्वे सेवा थांबल्याने मुंबईतल्या लाखो चाकरमान्यांचे, खास करून महिलांचे अतोनात हाल झाले. २६ जुलैच्या प्रलयंकारी पावसाच्या आठवणीने मंगळवारी प्रत्येक मुंबईकराच्या काळजाचा ठोका चुकला होता.

अतिवृष्टीचा इशारा

हवामान खात्याने मंगळवारी, २९ ऑगस्ट रोजी दुपारी एक वाजता दिलेल्या इशाऱ्यानुसार पुढील ४८ तासांत उत्तर मध्य महाराष्ट्र व उत्तर कोकणासाठी अतिवृष्टीचा इशारा हवामान खात्याने दिलेला आहे.

आज शाळा, कॉलेजे बंद!

येत्या ४८ तासांत अतिवृष्टीचा इशारा हवामान खात्याने दिल्याने मुंबई व उपनगरांतील शाळा, कॉलेजे बंद ठेवण्याचा निर्णय घेण्यात आला आहे.

पालिकेने यंदा नालेसफाईची कामे व्यवस्थित केली आहेत. पम्पिंग स्टेशनही आपले काम चोख बजावत आहेत. त्यामुळे यंदा कमी ठिकाणी पाणी तुंबले आहे. पालिका आपत्तीला सामोरे जात आहे. मात्र नाल्यांच्या क्षमतेपेक्षाही प्रचंड पाऊस पडत असल्याने त्यासाठी पालिकेला जबाबदार धरता येणार नाही.
- विश्वनाथ महाडेश्वर, महापौर मुंबई