महिला आरोग्यासाठी पावले

soniya.narkar@timesgroup.com

Tweet : @SoniyaMT

मुंबई ः महिलांची मासिक पाळी हा उघडपणे न बोलण्याचा विषय. त्यामुळे त्यासंबंधित आरोग्यविषयक तथ्ये समजून घेण्यापेक्षा गैरसमज, अंधश्रद्धांचा पगडाच अधिक आढळतो. याच गैरसमजुती दूर करून मुलींना शरिराबाबत जागरूक करण्यासाठी ‘स्टेपअप फाउंडेशन’ने पावले उचलली आहेत. या संस्थेच्या वतीने मासिक पाळीविषयीचे गैरसमज दूर करणे आणि पाळीच्या काळातील स्वच्छता या विषयावर मुली महिलांना सजग करण्यासाठी शाळा, कॉलेज, गावांमध्ये जाऊन शिबिरे घेतली जातात. एप्रिलपासून सुरू झालेल्या या उपक्रमाअंतर्गत गेल्या सात-आठ महिन्यांत साडेतीनशेहून अधिक शिबिरे घेण्यात आली आहेत.

वसई येथील यती राऊत आणि स्वप्नील शिर्सेकर या उद्योजक बंधूभगिनींनी ‘स्टेपअप फाउंडेशन’च्या माध्यमातून या कामाची सुरुवात केली. नॅशनल इंटिग्रेटेड मेडिकल असोसिएशनच्या मार्गदर्शनाखाली दोन-अडीच तासांच्या या शिबिराची आखणी करण्यात आली. वैज्ञानिक माहिती, खेळ, चर्चा या माध्यमातून मुले आणि मुली दोघांनाही हा विषय समजावून सांगितला जातो. या विषयावर कुमारवयीन मुलामुलींशी बोलणे आणि महत्त्वाचे म्हणजे त्यांना बोलते करणे हे कौशल्याचे काम यती आणि स्वप्नील यांनी पार पाडले. आता त्यांच्या मित्र परिवाराचीही त्यांना साथ मिळाली. आतापर्यंत मुंबई - ठाणे परिसरासह रायगड, सिंधुदुर्ग, नाशिक, पुणे, सातारा आदी जिल्ह्यांमध्ये त्यांनी हे कार्यक्रम केले आहेत. शाळा कॉलेजांसह वसईत भुईगाव, पापडी येथील मंदिरांमध्येही हे कार्यक्रम झाले आहेत. या शिबिरांमध्ये वैज्ञानिक माहिती देण्याबरोबरच सुमारे साडेचार लाख विनामूल्य सॅनिटरी नॅपकिनचे वाटपही करण्यात आले आहे.

जैवविघटनशील सॅनिटरी नॅपकिन्स

सध्या बाजारात उपलब्ध असलेल्या सॅनिटरी नॅपकिन्समध्ये ड्रायनेट प्लास्टिकचा वापर केलेला असतो. त्याचा आरोग्यावर दुष्परिणाम होऊ शकतो. हे लक्षात घेऊन स्टेपअपने लाकडाचा लगदा, बटर पेपर या नैसर्गिक घटकांपासून जैविक विघटनशील नॅपकिन्स विक्रीसाठी तयार केले आहेत. त्यांबाबत जागरुकता आणि वितरणासाठी केवळ महिलांचे जाळे उभारण्याचे काम सुरू आहे.