मुंबईच्या रस्त्यांवर धावतायत चोरीच्या रिक्षा

मुंबई: रिक्षा चोरून त्या भाड्याने लावणाऱ्या टोळीचा एम.एच.बी. कॉलनी पोलिसांनी पर्दाफाश केला आहे. या प्रकरणी पोलिसांनी नुकतीच तिघांना अटक केली असून, त्यांच्याकडून चोरीच्या १३ रिक्षा हस्तगत केल्या आहेत.

पश्चिम उपनगरांत गेल्या काही दिवसांपासून रिक्षाचोरीच्या अनेक घटना घडत होत्या. उत्तर प्रादेशिक विभागातील बहुतांश पोलिस ठाण्यात रिक्षाचोरीचे गुन्हे दाखल केले जात होते. याची गंभीर दाखल घेत अपर पोलिस आयुक्त दिलीप सावंत, उपायुक्त मोहन दहीकर यांनी या प्रकरणी तपास सुरू केली. एम.एच.बी. पोलिस ठाण्याचे वरिष्ठ पोलिस निरीक्षक पंडित ठाकरे, निरीक्षक धनंजय लिंगाडे, उपनिरीक्षक विजय धोत्रे यांनी चोरीचे गुन्हे दाखल असलेल्या परिसरातील सीसीटीव्ही तपासले. चोरांची गुन्हेपद्धत, तांत्रिक पुरावे यांमधून मालवणी येथील काही तरुण या रॅकेटमध्ये सक्रिय असल्याची माहिती मिळाली. या माहितीच्या आधारे पोलिसांनी मालवणी येथून रवी खारवा, संजय चौरसिया आणि सईद अहमद उल्ला सईद या तिघांना ताब्यात घेतले.

या तिघांची कसून चौकशी केली असता त्यांच्याकडे १३ चोरीच्या रिक्षा असल्याचे आढळले. या रिक्षा त्यांनी बोरिवली, समता नगर, चारकोप, कांदिवली तसेच पश्चिम उपनगरातील वेगवेगळ्या ठिकाणांहून चोरल्या होत्या. या टोळीमध्ये आणखी काही आरोपींचा समावेश असून त्यांचा शोध सुरू असल्याचे म्हटले आहे.