पाणी गोडे करण्यापेक्षा गळती थांबवा; भाजपचा मुख्यमंत्र्यांना टोला

मुंबई: समुद्राचे रोज २०० दशलक्ष लिटर पाणी गोडे करण्यासाठी १६०० कोटींच्या प्रकल्पाची गरज आहे का, महागड्या प्रकल्पाऐवजी त्यातील ४० टक्के खर्चात सध्याची गळती थांबली तर रोज २०० दशलक्ष लिटरच्या दुप्पट पाणी वाचेल, अशी भूमिका भाजपचे नेते आशीष शेलार यांनी मांडली.

समुद्राचे रोज २०० दशदशलक्ष लिटर पाणी गोडे करण्याच्या राज्य सरकारच्या प्रकल्पाबाबत शेलार म्हणाले, 'मुंबईचा रोजचा पाणीपुरवठा ३८०० दशलक्ष लिटर आहे. गळतीमुळे रोज वाया जाणारे पाणी सुमारे ९०० दशलक्ष लिटर आहे. महापालिका आणि आतंरराष्ट्रीय मानकाप्रमाणे कमीतकमी १० टक्के म्हणजे ३८० दशलक्ष लिटर पाण्याची गळती सहज थांबवता येते. 'एच पश्चिम प्रभागात, पायलट प्रोजेक्ट करून एका वर्षात गळतीने वाया जाणारे १०० कोटी लिटर पाणी वाचवले. पालिका २४ प्रभागांत असा प्रयत्न करून वाया जाणारे पाणी का वाचवत नाही', असा सवाल त्यांनी केला.