हॉटेल सेवाशुल्कात अजब चढउतार

sharmila.kalgutkar@timesgroup.com

tweet @ksharmilaMT

मुंबई : हॉटेलमध्ये गेल्यावर बिलात असेल तितकी रक्कम देऊन वर टिपही देणा‍ऱ्या मुंबईकरांकडून याच शहरातील तीनशेहून अधिक हॉटेल्समधून तीन ते बारा टक्के सेवाकर उकळण्यात येत असल्याचे मुंबई ग्राहक पंचायतीने सर्वेक्षणाच्या आधारे दाखवून दिले आहे. आठ दिवसांपूर्वी हॉटेल्समधून घेण्यात येणा‍ऱ्या सेवाशुल्काविरोधात सुरू झालेल्या मोहिमेमध्ये तीनशेहून अधिक मुंबईकरांनी हॉटेल्सवाल्यांनी दिलेल्या बिलांचे फोटोच काढून पाठवले. त्यांचा अभ्यास केल्यावर खाद्यपदार्थांच्या किमतीवर सेवाकर, व्हॅट, सेवाशुल्क यांचाही तिहेरी भुर्दंड ग्राहकांना बसल्याचे निष्पन्न झाले.

एरव्ही न कुरकुरता ही बिले मुकाटपणे भरणा‍ऱ्या ग्राहकांनी आता याविरोधात मुंबई ग्राहक पंचायतीच्या मोहिमेला पाठिंबा दर्शवला आहे. सेवाकर नेमका का आकारला जातो, त्याची टक्केवारी किती असावी, तो नियमांत बसतो का, तो ऐच्छिक असल्यास व ग्राहकांनी त्यातून सूट मागितल्यास हॉटेल व्यावसायिक त्यातून ग्राहकाला सूट देतात का, याप्रकारचे प्रश्न मुंबई ग्राहक पंचायतीने उपस्थित केले होते. ग्राहकांना नेमका कसा अनुभव येतो, याचे सर्वेक्षण करण्यासाठी पंचायतीच्या माध्यमातून आठ दिवसांपूर्वी ही मोहीम सुरू झाली होती. त्यातून मुंबईच्या विविध भागांसह ठाणे, पालघर, पनवेल येथूनही सामान्यांनी विविध हॉटेल्सच्या बिलांचे फोटो काढून पाठवले. त्यांचा अभ्यास केल्यावर व्हॅट, सेवा कर, सेवाशुल्क असा तिहेरी बोजा ग्राहाकांच्या माथी मारला जात असल्याचे आढळले.

दारूपेक्षा शीतपेये महाग!

बिलांच्या या अभ्यासानुसार खाद्यपदार्थांवर आकारला जाणारा व्हॅट १३.५ टक्के इतका आहे, तर शीतपेयांवर हाच व्हॅट २५ टक्के आहे. या दोघांच्या तुलनेत दारूवर मात्र अवघा पाच टक्के व्हॅट आकारला जातो! दक्षिण मुंबईतील काही उच्चभ्रू हॉटेलांमध्ये कृष‌िकल्याण व स्वच्छता करही बिलांमध्ये लावण्यात आला आहे. काही हॉटेल मालक स्वतः चालवत नाहीत, त्यांनी ती चालवायला दिलेली असतात. त्यामुळे हॉटेल्स चालवणारा सेवाशुल्कातून सूट देत नाही. काही ठराविक हॉटेल्सचे एकूण उत्पन्न किती आहे, यावर सेवाशुल्क आकारले जाते का, असाही प्रश्न मुंबई ग्राहक पंचायतीचे कार्याध्यक्ष अॅड. शिरीष देशपांडे यांनी उपस्थित केला आहे. बिलांच्या संदर्भातील मोहिमेची रविवारी समाप्ती झाली असली तरीही ऐच्छिक सेवाशुल्कांच्या संदर्भातील देशव्यापी ऑनलाइन मोहीम मात्र २७ जानेवारीपर्यंत सुरू राहणार आहे. त्यात या करातून सूट मागितलेल्यांना हॉटेल व्यावसायिक कसा प्रतिसाद देतात हे पाहणे औत्सुक्याचे ठरणार आहे.

हे काही बिलांचे नमुने

बिअर कॅफे, माहीम

सेवाशुल्क – १० टक्के

सेवा कर - ६ टक्के

व्हॅट (खाद्यपदार्थ) - १३ टक्के

व्हॅट – (दारूवर)- ६ टक्के

वर्ल्ड स्ट्रेट फूड, नरिमन पॉइंट

व्हॅट (खाद्यपदार्थ) - १३.५ टक्के

कृष‌िकल्याण - ०.२० टक्के

सेवाशुल्क -०.५ टक्के

सेवा कर – ५.६ टक्के

स्वच्छ भारत – ०.२ टक्के