भाभा रुग्णालयात काम बंद आंदोलन

म. टा. खास प्रतिनिधी, मुंबई

कर्मचाऱ्यांच्या रिक्त जागा तातडीने भराव्यात या मागणीसह विविध मागण्यांच्या पूर्ततेसाठी वांद्रे येथील भाभा रुग्णालयातील कर्मचाऱ्यांनी गुरुवारी काम बंद आंदोलन पुकारले. मात्र, कामगारांचे प्रश्‍न दोन आठवड्यांत सुटतील, असे आश्‍वासन रुग्णालय प्रशासनाने दिल्यानंतर आंदोलन मागे घेण्यात आले.

रिक्त जागा भरल्या जात नसल्याने कामाचा ताण येत असल्याची कर्मचाऱ्यांची तक्रार होती. याबाबत वारंवार मागणी करूनही कोणताही मार्ग निघत नसल्याने अखेर कर्मचाऱ्यांनी आंदोलनाचा निर्णय घेतला. भाभा रुग्णालय म्युनिसिपल कर्मचारी कामगार सेना, रुग्णालय मजदूर युनियन आणि महापालिका आरोग्यसेवा कर्मचारी संघटना आंदोलनात सहभागी झाल्या होत्या. कक्षसेवक, परिचारिका व तंत्रज्ञान विभागाचे कर्मचारीही आंदोलनात सहभागी झाले होते. त्यामुळे वैद्यकीय सेवांवर परिणाम दिसून आला.

दुपारनंतर रुग्णालयाचे मुख्य वैद्यकीय अधीक्षक डॉ. शशिकांत वाडेकर, वैद्यकीय अधीक्षक प्रदीप जाधव यांनी संघटनेच्या पदाधिकाऱ्यांशी चर्चा केली. संघटनांच्या मागण्यांना सकारात्मक प्रतिसाद मिळाल्याने हे आंदोलन दुपारी तीन वाजता मागे घेण्यात आले. परिचारिकांच्या मागण्यांबाबत रुग्णालय प्रशासनाने सकारात्मकता दर्शवली असून, याबाबतची पुढील बैठक २८ सप्टेंबर रोजी घेतली जाणार आहे.