सुनील माने माफीचा साक्षीदार नको; अँटिलिया प्रकरणात एनआयएचा तीव्र विरोध

म. टा. विशेष प्रतिनिधी, मुंबई : अँटिलिया विस्फोटके दहशत व मनसुख हिरेन हत्याकांड प्रकरणात माफीचा साक्षीदार बनण्यासाठी माजी पोलिस अधिकारी सुनील मानेने विशेष ‘एनआयए’ न्यायालयात दिलेल्या अर्जाला ‘एनआयए’ने लेखी उत्तराद्वारे तीव्र विरोध दर्शवला आहे. ‘मानेचा या दोन्ही गुन्ह्यांत थेट सहभाग असून इतर आरोपींइतकीच त्याचीही भूमिका महत्त्वाची आहे. त्यामुळे त्याच्या अर्जाचे समर्थन करू शकत नाही,’ असे म्हणणे ‘एनआयए’ने आपल्या उत्तरात मांडले आहे.

२५ फेब्रुवारी २०२१रोजी प्रसिद्ध उद्योगपती मुकेश अंबानी यांच्या ‘अँटिलिया’ निवासस्थानाजवळ विस्फोटके भरलेले वाहन उभे करून दहशत पसरवणे आणि त्यानंतर त्या वाहनाचे मालक हिरन यांची हत्या करणे या प्रकरणात बडतर्फ पोलिस अधिकारी सचिन वाझे, प्रदीप शर्मा, विनायक शिंदे व सुनील माने हे आरोपी आहेत.

‘मला माझ्या चुकीची जाणीव झाली असून कृतीचा पश्चात्ताप होत आहे. त्यामुळे पोलिस सेवेतील माझी आतापर्यंतची उल्लेखनीय कारकीर्द लक्षात घेऊन मला प्रायश्चित्त घेण्याची संधी द्यावी. पीडित कुटुंबाला न्याय मिळण्यासाठी मी संपूर्ण घटनाक्रम व वस्तुस्थिती उघड करण्याचे ठरवले आहे. त्यामुळे माफीचा साक्षीदार बनवून मला माफी द्यावी,’ अशा विनंतीचा हस्तलिखित अर्ज मानेने १७ फेब्रुवारी रोजी न्यायालयात दिला होता. त्याबाबत ‘एनआयए’ने नुकतेच आपले लेखी उत्तर दाखल करून मानेच्या अर्जाला तीव्र विरोध दर्शवला.


एनआयए उत्तरात म्हणते...

‘या गुन्ह्यांच्या प्रकरणांतील पुरावे आम्ही तपासले. ते लक्षात घेता आरोपीच्या (माने) अर्जाला आम्ही समर्थन देऊ शकत नाही. या प्रकरणांतील त्याची भूमिका पाहिली तर इतर आरोपींसह त्याचा या गुन्ह्यांत थेट सहभाग असल्याचे सुस्पष्ट आहे. म्हणूनच त्याच्याविरोधात बेकायदा कारवाया प्रतिबंधक कायदा आणि भादंविच्या विविध कलमांखाली आरोपपत्र दाखल केले आहे. त्यामुळे माफीचा साक्षीदार बनण्याचा त्याचा अर्ज फेटाळण्यात यावा,’ असे म्हणणे ‘एनआयए’ने आपल्या उत्तरात मांडले आहे.