चुकून ‘प्रोसीड टू अॅडमिशन’ करणाऱ्या विद्यार्थ्यांना दिलासा

म. टा. विशेष प्रतिनिधी, मुंबई

अकरावी ऑनलाइन प्रवेश प्रक्रियेदरम्यान पारदर्शकता आणण्यासाठी आणि कॉलेजांकडून होणाऱ्या गैरप्रकारांना आळा घालण्यासाठी यंदापासून 'प्रोसीड टू अ‍ॅडमिशन' ही पद्धत सुरू करण्यात आली आहे. ज्यायोगे कॉलेजांना प्रवेशाचे अधिकार देण्यापेक्षा विद्यार्थ्यांना या पर्यायावर क्लिक करून आपला प्रवेश निश्चित करता येणार आहे. मात्र, चुकून हा पर्याय वापरल्याने अनेक विद्यार्थ्यांना फटका बसल्याचे समोर आले. याबाबतचे वृत्त 'मटा'ने प्रसिद्ध केले होते. यानंतर शिक्षण उपसचांलकांनी याची दखल घेत हे विद्यार्थी जोपर्यंत प्रत्यक्ष कॉलेजांमध्ये जाऊन प्रवेश घेत नाहीत तोपर्यंत त्यांचे प्रवेश निश्चित करू नयेत, असे आदेश कॉलेजांना दिले आहेत.

अकरावी ऑनलाइन प्रवेश प्रक्रियेतील अनेक बदल शिक्षण उपसंचालकांनी यंदापासून अंमलात आणले आहेत. यापूर्वी अकरावी प्रवेश प्रक्रियेदरम्यान पहिली गुणवत्ता यादी जाहीर झाल्यानंतर विद्यार्थी आपल्या हातून जाऊ नयेत म्हणून काही कॉलेजांकडून विद्यार्थ्यांची संमती न घेताच प्रवेश निश्चित केले जात होते. म्हणूनच शिक्षण उपसंचालक विभागाने 'प्रोसीड टू अ‍ॅडमिशन' ही पद्धत सुरू केली. मात्र, यंदा पहिल्या गुणवत्ता यादीत दुसऱ्या ते आठव्या पसंतीक्रमाची कॉलेजे जाहीर झाली असतानाही अनेक विद्यार्थ्यांनी 'प्रोसीड टू अ‍ॅडमिशन' पर्याय क्लिक केल्याने त्यांना संबंधित कॉलेजातच प्रवेश घ्यावा लागणार आहे. मात्र या विद्यार्थ्यांना आता दिलासा मिळणार आहे.

प्रवेशासाठी मुदतवाढ

अतिवृष्टीमुळे अकरावी ऑनलाइन अॅडमिशन पहिल्या गुणवत्ता यादीतील प्रवेश घेण्यासाठी एक दिवसाची मुदतवाढ देण्यात आली आहे. पहिल्या गुणवत्ता यादीतील विद्यार्थ्यांना आज, १० जुलै रोजी सायंकाळी ६ वाजेपर्यंत कॉलेजमध्ये जाऊन प्रवेश घेता येतील, असे शालेय शिक्षण विभागाच्या सहसचिव सुवर्णा खरात यांनी जाहीर केले.