म. टा. प्रतिनिधी, मुंबई
१९८०च्या दशकात रशियाकडून घेतलेल्या 'सिंधू' श्रेणीतील पाणबुड्यांच्या दुरुस्तीसाठी रशियाकडून सुटे भाग मिळेनासे झाले आहेत. या पाणबुड्यांचा मुख्य तळ मुंबईत आहे. यामुळे आर्थिक राजधानी मुंबईच्या निमित्ताने अरबी समद्रावर देखरेख करणाऱ्या कार्यरत पाणबुड्यांची संख्या कमी होण्याची भीती निर्माण झाली आहे.
नौदलाच्या पश्चिम कमांडचे मुख्यालय मुंबईत आहे. अलीकडे ताफ्यात आलेल्या फ्रेंच तंत्रज्ञानावरील अत्याधुनिक स्कॉर्पिअन पाणबुड्यांचा तळ मुंबईतच आहे. पण त्याही आधीपासून 'सिंधू' श्रेणीतील मोठ्या आकाराच्या व बहुमजली पाणबुड्या गेली २५ ते ३० वर्षांपासून या कमांडअंतर्गत अरबी समुद्रावर लक्ष ठेऊन आहेत. या पाणबुड्यांची आता तातडीने दुरूस्ती करण्याची गरज आहे. पण त्यासाठी रशियाकडून हवे तसे सहकार्य मिळत नसल्याचे चित्र आहे. नौदलातील संबंधित उच्चाधिकाऱ्यांनी सांगितले की, 'सिंधू श्रेणीतील पाचपैकी दोन पाणबुड्यांची मोठी दुरुस्ती तात्काळ करावी लागणार आहे. तर तीन पाणबुड्यांची लहान स्वरुपाची दुरुस्ती आता होणे अपेक्षित आहे. हे काम कुलाब्यातील नौदल गोदीतच होणार आहे. परंतु रशियाकडून सुटे भाग उपलब्ध होत नसल्याने हे संपूर्ण काम सध्या थांबलेले आहे. संरक्षण मंत्रालय स्तरावर त्यासाठी कसोशीने प्रयत्न सुरू आहेत.'