- स्वयंचलित केंद्राची तापमान नोंद : ३६.३ अंश सेल्सिअस
- हवामान विभागाची तापमान नोंद : ३४.८ अंश सेल्सिअस
म. टा. विशेष प्रतिनिधी, मुंबई
रविवारी मुंबईचे तापमान तीन वर्षांतील सर्वाधिक तापमान म्हणून नोंदले गेले. मात्र सोमवारी याचे चटके अधिक प्रमाणात मुंबईकरांनी अनुभवले. रविवारपेक्षाही तापमानाचा ताप सोमवारी दुपारी उपनगरवासियांना जास्त जाणवला. सफरच्या यंत्रणेनुसार चेंबूर, भांडुप, मुलुंड येथे ३६ अंश सेल्सिअस तापमानाची नोंद झाली, तर मुंबई शहरामध्ये कमाल तापमान ३३ ते ३४ अंशांदरम्यान होते. सांताक्रूझ येथे कमाल तापमान ३४.८ अंश सेल्सिअस नोंदले गेले. मात्र सांताक्रूझ येथील स्वयंचलित हवामान मापकानुसार सांताक्रूझ येथे सोमवारी सर्वाधिक तापमान ३६.३ अंश सेल्सिअस नोंदले गेले.
सोमवारी रविवारपेक्षाही जास्त ताप जाणवत असल्याने हे तापमान रविवारपेक्षा खरोखरच कमी आहे का आणि नेमका विश्वास कोणत्या तापमानावर ठेवायचा असा प्रश्न निर्माण झाला? स्वयंचलित हवामान मापकावर नोंदले गेलेले तापमान आणि हवामान विभागाकडून जाहीर करण्यात आलेले तापमान यामध्ये सुमारे १.५ अंशांहून अधिक फरक कसा असू शकतो, यासंदर्भात विचारणा सुरू झाली आहे. सांताक्रूझ येथील हवामान विभागाने नोंदवलेले किमान तापमान सोमवारी २५.४ आहे, तर स्वयंचलित केंद्रावरील नोंदणी २५.५ अंश सेल्सिअस आहे. या तापमानामध्ये फारसा फरक नाही. त्यामुळे कमाल तापमानातील तफावत एवढी जास्त का हा प्रश्न सोडवला जाण्याची अपेक्षा मुंबईकर नागरिकांकडून करण्यात येत आहे. कुलाबा येथे हवामान विभागाकडून नोंदवण्यात आलेले तापमान ३४ अंश सेल्सिअस होते, तर स्वयंचलित केंद्रावर नोंदले गेलेले दिवसभरातील सर्वाधिक कमाल तापमान ३३.८ होते. या दोन्ही तापमानामध्ये फारशी तफावत नव्हती. या गोंधळासंदर्भात बोलताना हवामानशास्त्रज्ञ डॉ. जीवनप्रकाश कुलकर्णी यांनी दोन्ही नोंदींमध्ये एवढी तफावत असणे अपेक्षित नाही असे सांगताना यंत्रणेचे योग्य कॅलिबरेशन लवकरात लवकर होणे गरजेचे असल्याचे मत नोंदवले.
किनाऱ्याजवळ निर्माण झालेली चक्रीय वात स्थिती आणि पश्चिम ते वायव्य पट्ट्यातून वाहणारे वारे यामुळे तापमानवाढ झाल्याचे हवामान विभागाकडून स्पष्ट करण्यात आले आहे. ही तापमानवाढ ऋतुमानानुसार असून येत्या काळात तापमानामध्ये आणखी वाढ होण्याची शक्यता असल्याची माहिती प्रादेशिक हवामान विभागाचे उपमहासंचालक कृष्णानंद होसाळीकर यांनी दिली. हवामान विभागाने वर्तवलेल्या अंदाजानुसार आज, मंगळवारी मुंबईचे किमान तापमान २६, तर कमाल तापमान ३५ अंश सेल्सिअस असेल.