१५०पैकी केवळ ४० व्हेंटिलेटरचा पुरवठा

Sharmila.kalgutkar@timesgroup.com

महाराष्ट्र टाइम्स.कॉम

Twitter - @ksharmilaMT

मुंबई : सार्वजनिक आरोग्य यंत्रणेमधील अपुऱ्या व्हेण्टिलेटरचा तुटवडा भरून काढण्यासाठी हाफकीन बायोफार्माने रुग्णालयांमधील उपलब्धता जाणून २१ मार्च रोजी १५० व्हेण्टिलेटर पुरवण्याचे काम एका खासगी कंपनीला दिले. मात्र आज चार महिन्यांचा कालावधी उलटला तरीही या कंपनीने अवघे चाळीस व्हेण्टिलेटर उपलब्ध करून दिलेले आहेत. टेंडर भरताना हाफकीन बायोफार्माने घालून दिलेल्या अटीशर्तींची पूर्तता या कंपनीने केलेली नसली तरीही या कंपनीचे कंत्राट अद्याप रद्द करण्यात आलेले नाही. हाफकीन बायोफार्माचे जनरल मॅनेजर डॉ. आर. एम. कुंभार यांनी आपत्कालीन परिस्थितीमध्ये कंत्राट रद्द करता येत नाही, असे 'मटा'ला सांगितले.

२१ मार्च रोजी या कंपनीसोबत केलेल्या करारामध्ये प्रौढ आणि लहान मुलांसाठी प्रति व्हेण्टिलेटर ११ लाख ४८ हजार रुपये मोजून १५० व्हेण्टिलेटर उपलब्ध करण्यासाठी १७ कोटी २२ लाख रुपयांचे कंत्राट देण्यात आले. साथीच्या आजारांचा जोर लक्षात घेता कोव्हिड-१९साठी विशेषत्वाने हे कंत्राट देण्यात आले, त्याची पूर्तता संबधित कंपनीने पंधरा दिवसांत करणे अपेक्षित होते. या उत्पादनाच्या संदर्भातील गुणवत्तेचा अहवाल उत्पादकाला तातडीने पाठवायचा होता. गुणवत्तेच्या निकषांची पूर्तता झाल्यानंतर पुढील प्रक्रिया पूर्ण करणे अपेक्षित होते. व्हेण्टिलेटरचा पुरवठा करणाऱ्या कंपनीने सात दिवसांत अमानत आणि प्रासंगिक असे ७७ लाख ४९ हजार रुपये बँक गॅरंटीच्या स्वरूपात द्यावे, असेही नमूद करण्यात आले होते. मुंबईमध्ये काही ठिकाणी करोना संसर्गाचा जोर कमी होत असला तरीही तो राज्यातील इतर जिल्ह्यांमध्ये झपाट्याने वाढत आहे. या ठिकाणी व्हेण्टिलेटरची उपलब्धता न झाल्यामुळे रुग्णांच्या जिवावरही बेतू शकते. चार महिन्यांच्या कालावधीत या कंपनीने व्हेण्टिलेटरची उपलब्धता केली नाही. त्यामुळे अटीशर्तींनुसार कंत्राट रद्द करून व्हेण्टिलेटरच्या उपलब्धतेसंदर्भात पर्यायी विचार का करण्यात आला नाही, असा प्रश्न यानिमित्ताने उपस्थित झाला आहे.

यासंदर्भात डॉ. कुंभार म्हणाले, 'सध्या आपत्कालीन परिस्थितीमध्ये अनेक अडचणी आहेत, कारखाने बंद आहेत, मनुष्यबळ नाही, त्यामुळे हा पुरवठा कमी झाला आहे. स्थानिक पातळीवर जिल्ह्याधिकाऱ्यांनाही अधिकार देण्यात आले आहेत. पुरवठा वेळेवर झाला नाही तरीही तातडीने कंत्राट रद्द करता येत नाही. तसेच येणाऱ्या उत्पादनाला नाकारता येत नाही. जितके अतिरिक्त दिवस विलंब होईल, तितकी दंडाची रक्कम आकारण्यात येईल. मात्र, या कंपनीकडून अद्याप बिले आलेली नाहीत.' १५ दिवसांमध्ये या कंपनीने चाळीस व्हेण्टिलेटर पुरवले असतील तर त्यांची दंडाची रक्कम कापून घेत ही भरपाई हाफकीन बायोफार्माने करणे अपेक्षित आहे. मात्र अशी कोणतीही अमानत ठेवही न घेतल्याचे प्रशासनाचे म्हणणे आहे.

कंपनीने हाफकीनचा संदर्भ देऊन राज्यातील स्थानिक प्रशासनालाही या व्हेण्टिलेटर्सच्या पुरवठा करण्याची तयारी दर्शवली आहे. प्रत्यक्षात मुंबईतही वीस ते बावीस व्हेण्टिलेटरचा पुरवठा केला आहे. करोना काळामध्ये केली जाणारी खरेदी ही आपत्कालीन परिस्थिती लक्षात घेऊन करायची असते. ही कंपनी जर व्हेण्टिलेटरची उपलब्धता करून द्यायला सक्षम ठरली नाही तर ज्यांनी या उत्पादनाचा पुरवठा करण्याची इच्छा प्रदर्शित केली आहे त्यांना त्यासाठी संधी देण्यात येते, असा नियम आहे. करोना संसर्गाच्या काळात हा विचार करण्यात आला नाही. हाफकीन बायोफार्माचे व्यवस्थापकीय संचालक डॉ. राजेश देशमुख यांच्याशी संपर्क साधण्याचा प्रयत्न केला असता तो होऊ शकला नाही.