म. टा. विशेष प्रतिनिधी, मुंबई
माहीम मतदारसंघातून चारवेळा निवडून आलेले शिवसेनेचे माजी आमदार सुरेश गंभीर यांनी शुक्रवारी भाजपमध्ये प्रवेश केला. त्यांच्यासोबत बेस्ट समितीवर सदस्य म्हणून कार्यरत असलेले कामगार नेते सुनील गणाचार्य यांनीही भाजपमध्ये आले आहेत.
मुख्यमंत्री देवेंद्र फडणवीस यांची भेट घेतल्यानंतर गुरुवारी गंभीर यांच्या औपचारिक प्रवेशाचा कार्यक्रम मुंबई भाजपचे अध्यक्ष आमदार आशिष शेलार यांच्या उपस्थितीत झाला. माहीम परिसरातून सन १९७८मध्ये नगरसेवक आणि त्यानंतर माहीम विधानसभा मतदारसंघातून चारवेळा आमदार म्हणून सुरेश गंभीर निवडून आले होते. तसेच त्यांनी लोकसभा निवडणूकही लढवली होती. सुनील गणाचार्य हे बेस्ट समितीवर कार्यरत असून १९९७ ते २००२ या काळात ते कुर्ला येथून नगरसेवक म्हणून निवडून आले होते. तर त्यानंतर २००४पासून ते बेस्ट समितीवर सदस्य म्हणून आजतागायत कार्यरत आहेत. तर २००५पासून बेस्ट कामगार सेनेचे सरचिटणीस आणि महाराष्ट्र एसटी कामगार सेनेचे सरचिटणीस म्हणून कार्यरत आहेत.
‘मी यापूर्वी ज्या पक्षात होतो तिथेही मला सन्मानाची वागणूक मिळाली. माझा कोणताही रोष त्या पक्षावर नाही. त्या पक्षाचे नेतेही चांगले काम करत आहेत. पंतप्रधान नरेंद्र मोदी करत असलेल्या सामान्य माणसासाठीच्या कामात सहभागी होता यावे म्हणून मी भाजपमध्ये प्रवेश करत असून मी कोणत्याही पदासाठी आणि उमेदवारीसाठी पक्षात आलेलो नाही’, असे पक्ष प्रवेशानंतर बोलताना गंभीर म्हणाले.