म. टा. प्रतिनिधी, मुंबई
शिर्डी येथील श्री साईबाबा संस्थानचे अध्यक्ष सुरेश हावरे यांना राज्यमंत्रिपदाचा दर्जा देण्याचा निर्णय राज्य सरकारने घेतला आहे. विधी व न्याय विभागाने याबाबत नुकताच शासन निर्णय जारी केला आहे.
हावरे यांना राज्यमंत्रिपदाचा दर्जा प्रदान केल्यामुळे त्यांना शासकीय समारंभात मानाचे स्थान मिळणार आहे. समितीच्या मुख्यालयात, कार्यालय, दौऱ्यावर असताना शासकीय वाहन व निवास व्यवस्था, मासिक मानधन व विविध भत्ते मिळतील. हावरे यांनी संस्थानचे अध्यक्ष म्हणून काम करताना सामाजिक कार्यावर भर दिला आहे. लोकसहभागातून शिर्डीच्या स्वच्छतेसाठी त्यांनी पुढाकार घेतला आहे. शिर्डीला आलेल्या भक्तांनी रक्तदान करावे यासाठी त्यांनी मोहीम सुरू केली व त्याला मोठा प्रतिसाद मिळाला. या उपक्रमात राज्यातील विविध रक्तपेढ्या सहभागी झाल्या. राज्यातील हजारो रुग्णांना लाभ झाला.
शिर्डीच्या साईबाबा संस्थानचे अध्यक्ष म्हणून काम करण्यापूर्वी त्यांनी जवाहरलाल नेहरू पोर्ट ट्रस्टचे विश्वस्त म्हणून काम केले आहे. त्यांनी भाभा ॲटोमिक रिसर्च सेंटरमधून न्यूक्लीअर इंजिनिअरिंगमध्ये पदव्युत्तर शिक्षण पूर्ण केले. अणु ऊर्जा विभागात २७ वर्षे वरिष्ठ अणुशास्त्रज्ञ म्हणून काम केले आहे. ते नागपूर विद्यापीठातील इंजिनीअरिंगमधील सुवर्णपदक विजेते आहेत. परवडणारी घरे याविषयी संशोधन करून त्यांनी मुंबई विद्यापीठाची डॉक्टरेट मिळवली आहे.