बजेटआधी प्रभूंनी केला होता 'बिग बी'ना फोन

मटा ऑनलाइन वृत्त । मुंबई

हिंदी चित्रपटसृष्टीच्या झगमगाटी दुनियेत राहूनही पाय जमिनीवर असलेले शालीन व सुसंस्कृत व्यक्तिमत्व अशी महानायक अमिताभ बच्चन यांची ओळख. राजकारणात हीच प्रतिमा विद्यमान केंद्रीय रेल्वेमंत्री सुरेश प्रभू यांची आहे. या दोघांच्या सौजन्याचं नवं उदाहरण नुकतंच समोर आलं आहे. रेल्वे अर्थसंकल्पाचं वाचन करण्याआधी सुरेश प्रभू यांनी अमिताभ यांना केलेला फोन हे त्यासाठी निमित्त ठरलं आहे.

त्याचं झालं असं... मोदी सरकारचा २०१६-१७चा रेल्वे अर्थसंकल्प सादर करताना सुरेश प्रभू यांना अमिताभ यांचे वडील, प्रख्यात कवी हरिवंशराय बच्चन यांच्या कवितेच्या काही ओळी बोलून दाखवायच्या होत्या. त्याची परवानगी घेण्यासाठी प्रभू यांनी अर्थसंकल्प सादर करण्याआधी अमिताभ बच्चन यांना फोन केला. अमिताभ यांनी तात्काळ त्यासाठी परवानगी दिली. त्यानंतर रेल्वेला सर्वोत्कृष्ट बनविण्याचा संकल्प सभागृहात बोलून दाखवताना प्रभू यांनी हरिवंशराय यांच्या 'नव उमंग, नव तरंग जीवन का नव प्रसंग... नवल चाह, नवल राह, जीवन का नव प्रवाह' या काव्यपंक्तींचा आधार घेतला होता.

अर्थसंकल्प सादर करून झाल्यानंतर प्रभू यांनी पुन्हा एकदा अमिताभ बच्चन यांना फोन केला आणि कवितेच्या ओळी वाचताना आपण काही चूक तर केली नाही ना, असं विचारलं. प्रभू यांच्या या सौजन्यानं अमिताभही भारावून गेले. त्यांनी लगेचच फेसुबक पोस्टच्या माध्यमातून हा किस्सा सर्वांशी शेअर केला. 'हल्लीच्या जमान्यात इतकं कुणी करत नाही,' असं म्हणत अमिताभ यांनी सुरेश प्रभू यांच्या सौजन्याची तोंडभरून स्तुती केली.