म. टा. खास प्रतिनिधी, मुंबई
पावसाळ्यात शहरातील अतिधोकादायक इमारतींच्या सुरक्षेचा प्रश्न ऐरणीवर येत असल्याने अशा इमारतींचा सुरक्षा आढावा घेण्याचे काम म्हाडाकडून सुरू करण्यात आले आहे. शहरात उपकरप्राप्त इमारतींची (सेस) संख्या सुमारे १४ हजार आहे. उपकरप्राप्त इमारतींचा आढावा घेऊन त्याप्रमाणे त्यांची वर्गवारी केली जात आहे. गतवर्षीच्या आढाव्यानुसार आठ इमारतींचा समावेश 'अतिधोकादायक' इमारतींमध्ये करण्यात आला होता. यंदा आढावा घेण्याची प्रक्रिया मे अखेरपर्यंत चालणार असून त्यातून अतिधोकादायक इमारतींची नेमकी स्थिती समजणार आहे.
म्हाडाकडून उपकरप्राप्त इमारतींची स्थिती जाणून घेतली जाते. खासगी मालकीच्या या इमारतींच्या देखभाल, दुरुस्तीचा गंभीर प्रश्न सोडवण्याची जबाबदारी म्हाडावर आहे. म्हाडा इमारत दुरुस्ती व पुनर्रचना मंडळातून याबाबत सर्व प्रक्रिया हाताळली जाते. सध्या लोकसभा निवडणुकीची कामे सुरू असून त्यासाठी अनेक अधिकारी-कर्मचारी प्रतिनियुक्तीवर आहेत. तरीही इमारतींचा सुरक्षा आढावा घेण्याच्या कामात खंड पडलेला नाही. या १४ हजार इमारतींपैकी अनेक इमारती जुन्या झाल्या असून त्या मोडकळीस आल्या आहेत. म्हाडाकडून दरवर्षी पावसाळ्यापूर्वी अतिधोकादायक इमारतींची यादी प्रसिद्ध केली जाते. त्यासाठी म्हाडाने रहिवाशांच्या माहितीसाठी नोटिसा पाठवल्या आहेत.
इमारती अतिधोकादायक असल्याचे स्पष्ट होताच त्यातील रहिवाशांना म्हाडाच्या संक्रमण शिबिरात तात्पुरता निवारा दिला जातो. मात्र संक्रमण शिबिरात रवानगी झाल्यास ३०-३० वर्षे मूळ घरात परतता येत नाही, अशी अवस्था आहे. त्यामुळे या भीतीने रहिवासी जुन्या, धोकादायक इमारत सोडण्यास तयार नसल्याचा अनुभव आहे. त्यामुळे टेकू लावलेल्या धोकादायक इमारतींमध्येही वास्तव्य करण्याची मानसिकता आहे. या रहिवाशांना घरातून बाहेर आणणे शक्य होत नाही. त्यासाठीच म्हाडाकडून इमारती रिकाम्या करण्यासाठी रहिवाशांनी सहकार्य करण्याचे आवाहन करण्यात आले आहे.
२०१६ मधील अतिधोकादायक इमारती- एकूण १३
१८८-१९० डॉ विगास स्ट्रीट, ४४-४६ काजी स्ट्रीट/९४-१०२, माजिद स्ट्रीट, १०८-१२२ शेख मेमन स्ट्रीट, ३९ चौपाटी सी फेस, २०८-२२०, काझी सय्यद स्ट्रीट, ५५-५७ नागदेवी क्रॉस लेन, इमारत क्र. १३ एफ चकला स्ट्रीट, ६-६ ब चमार लेन भायखळा, ४६-५०, मिर्जा गालिब रोड भायखळा लकी मॅन्शन, घरकुल एन. एम. जोशी मार्ग भायखळा, १४४ एम. जी. रोड एक्स्पनेंड मेन्शन, गोरागांधी चाळ इ. क्र १२२ सी खेतवाडी