पालिकेचं स्वच्छता मिशन; नगरसेवकांना देणार एक कोटींचा पुरस्कार

मुंबई: स्वच्छ मुंबईचं मिशन पूर्ण करण्यासाठी मुंबई महापालिकेने कंबर कसली आहे. आपल्या विभागात स्वच्छता राखणाऱ्या नगरसेवक/ नगरसेविकांना महापालिका एक कोटी रुपयांचा विशेष निधी पुरस्कार देणार आहे. पालिकेच्या सात परिमंडळाच्या स्तरावर हे पुरस्कार देण्यात येणार आहे. प्रत्येक परिमंडळात सहा अशा सात परिमंडळात एकूण ४२ पुरस्कार देण्यात येणार आहेत. 'स्वच्छ सर्वेक्षण २०२०' च्या निकषांच्या आधारे पुरस्कार विजेत्यांची निवड करण्यात येणार असून ३१ डिसेंबरपर्यंत विजेत्यांची घोषणा करण्यात येणार आहे.

घनकचरा व्यवस्थापन खात्याचे सहआयुक्त अशोक खैरे यांनी ही माहिती दिली. मुंबईत स्वच्छता मोहीम प्रभावीपणे राबविण्यासाठी आपल्या कार्यक्षेत्रात स्वच्छता राखणाऱ्या नगरसेवक/ नगरसेविकांना हे पुरस्कार देण्यात येणार आहेत. यात पहिला क्रमांक पटकाविणाऱ्या नगरसेवकांना १ कोटी, दुसरा क्रमांक पटकाविणाऱ्यास ५० लाख आणि तिसरा क्रमांक पटकाविणाऱ्यां नगरसेवक/नगरसेविकेला २५ लाख रुपये देण्यात येणार आहेत. याशिवाय तीन नगरसेवक/ नगरसेविकांना उत्तेजनार्थ प्रत्येकी १० लाखांचा पुरस्कार देण्यात येणार असल्याचं खैरे यांनी सांगितलं. म्हणजेच सात परिमंडळात प्रत्येकी सहा असे एकूण ४२ पुरस्कार देण्यात येणार आहेत.

स्वयंसेवी संस्थांना ५० लाखाचा पुरस्कार

तसेच स्वच्छता मोहीमेत सहभाग घेऊन नेत्रदीपक कामगिरी बजावणाऱ्या स्वयंसेवी संस्थांनाही ५ लाख ते ५० लाखापर्यंतचे पुरस्कार देण्यात येणार आहेत. स्वयंसेवी संस्थेला स्वच्छतेसाठी पहिला पुरस्कार ५० लाखांचा, दुसरा २५ आणि तिसरा १० लाखांचा पुरस्कार देण्यात येणार आहे. या शिवाय उत्तेजनार्थ ५ लाखाचे प्रत्येकी तीन पुरस्कार देण्यात येणार आहेत. सातही परिमंडळातील एकूण ४२ स्वयंसेवी संस्थांना रुपये ५ लाख ते ५० लाखांपर्यंतचे पुरस्कार देण्यात येणार आहेत.

शाळा, मंडईंनाही पुरस्कार

दरम्यान, स्वच्छता मोहीम प्रभावीपणे राबविणाऱ्या शाळा, मंडई आणि रहिवाशी कल्याणकारी संस्था आणि प्रसिद्ध व्यक्तिंनाही पुरस्कार देऊन गौरविण्यात येणार आहे. हा पुरस्कार सुद्धा महापालिकेच्या सातही परिमंडळनिहाय देण्यात येणार आहे. दरम्यान, या पुरस्काराची रक्कम अद्याप पालिकेने जाहीर केलेली नाही.