‘त्या’ स्कूल व्हॅन्सवर कारवाई करा

म. टा. विशेष प्रतिनिधी, मुंबई

राज्यभरात शाळकरी मुलांची ने-आण करण्यासाठी ज्या स्कूल व्हॅन परमिटविना धावत आहेत त्यांच्यावर कारवाई करा, असे तोंडी निर्देश मुंबई उच्च न्यायालयाने मंगळवारी राज्य सरकारला दिले. त्याचवेळी स्कूल व्हॅन व अन्य वाहनांमध्ये सुरक्षिततेचे नियम पाळले जात नसतील तर त्यांचा वापर न करता स्कूल बसचा वापर करण्याविषयी पालकांमध्ये जनजागृती करा, अशी सूचनाही न्यायालयाने सरकारला केली.

स्कूल व्हॅनच्या असुरक्षिततेविषयी 'पीटीए युनायटेड फोरम' या स्वयंसेवी संस्थेने केलेल्या जनहित याचिकेवर न्या. नरेश पाटील व न्या. गिरीश कुलकर्णी यांच्या खंडपीठासमोर पुढील सुनावणी झाली. त्यावेळी नियमांविरुद्ध सुरू असलेल्या शाळकरी वाहनांची तपासणी करण्याची विशेष मोहीम २२ जूनपासून राज्यभरात सुरू असून ती १२ जुलैपर्यंत चालेल. त्यानंतर त्याविषयीचा अहवाल सादर करू, अशी माहिती मुख्य सरकारी वकील अभिनंदन वग्यानी यांनी दिली. त्यामुळे खंडपीठाने सरकारला १७ जुलैपर्यंतची मुदत दिली. त्याचवेळी परळमध्ये मागील महिन्यात एका स्कूल व्हॅनने अचानक पेट घेतला, मात्र सुदैवाने शाळकरी मुले वाचली, असे न्यायालयाच्या निदर्शनास आणण्यात आले. त्याची दखल घेत परमिटविना ज्या स्कूल व्हॅन्स धावत असतील त्यांच्यावर कारवाई करा, असे तोंडी निर्देश देऊन खंडपीठाने पुढील सुनावणी १७ जुलैला ठेवली.