अविश्वासानंतरही नवी मुंबई आयुक्तपदी मुंढेच?

मटा ऑनलाइन वृत्त । मुंबई

नवी मुंबई महापालिका आयुक्त तुकाराम मुंढे यांच्यावर सभागृहात अविश्वास ठराव मंजूर झाला असला तरी, तेच आयुक्तपदी कायम राहतील, असे संकेत मुख्यमंत्री देवेंद्र फडणवीस यांनी दिल्याचे समजते. चोख कर्तव्य बजावून कारभारातील अनियमितता चव्हाट्यावर आणणाऱ्या आणि अवैध धंदे रोखणाऱ्या अधिकाऱ्यांना लक्ष्य करणं चुकीचं असल्याचं फडणवीस यांनी म्हटलं आहे.

२५ ऑक्टोबरला आयुक्त मुंढे यांच्याविरोधात सभागृहात अविश्वास ठराव मंजूर करण्यात आला होता. महापालिकेच्या इतिहासात पहिल्यांदाच आयुक्तांविरोधात अविश्वास ठराव मंजूर झाला होता. ते मनमानी कारभार करत असल्याचा आरोप सर्वपक्षीय नगरसेवकांनी ठेवला होता. त्यांची बदली करण्याची मागणीही झाली होती. पण मुख्यमंत्री फडणवीस यांनी त्यांनाच आयुक्तपदी कायम ठेवण्याचे संकेत दिले आहेत. ते लोकप्रतिनिधींसोबत योग्य पद्धतीने वागत नसल्याच्या तक्रारी आहेत. असं असलं तरी यावर पर्यायी मार्ग काढता येऊ शकतो, असं फडणवीस यांनी म्हटलं आहे. लोकप्रतिनिधींचा योग्य आदर राखला पाहिजे, असे स्पष्ट करत, त्यांचा सन्मान ठेवण्याच्या सूचना फडणवीस यांनी मुंढे यांना दिल्याचे समजते.

महापौर सुधाकर सोनावणे यांच्या अध्यक्षतेखाली २५ ऑक्टोबरला झालेल्या बैठकीत मुंढे यांच्याविरोधात ६ विरुद्ध १०५ मतांनी अविश्वास ठराव मंजूर करण्यात आला होता. त्यावेळी मुंढेही सभागृहात उपस्थित होते. त्यांच्यावर मनमानी कारभार केल्याचा आरोप ठेवण्यात आला होता. राजकीय पक्षाच्या नेत्यांशी संबंधित अवैध बांधकामांवर धडक कारवाई करणाऱ्या मुंढे यांना नवी मुंबईकरांनी पाठिंबा दर्शवला होता.