एसटीच्या थांब्यांवर ३० रुपयांत चहा-नाश्ता

आणखी १०० ठिकाणी सुरू होणार सुविधा

म. टा. खास प्रतिनिधी, मुंबई

एसटीच्या राज्यभरातील अधिकृत थांब्यांवरील उपाहारगृहांमध्ये ३० रुपयांत चहा-नाश्ता मिळण्याची योजना सुरू करण्यात आली आहे. सध्या अधिकृत २२ थांब्यांवर सुरू असणारी ही सुविधा आणखी १०० थांब्यावरील उपाहारगृहांमध्ये सुरू करण्यात येणार आहे. त्यात हेळसांड करणाऱ्या चालकाचा परवाना रद्द करण्याचा सज्जड इशाराही महामंडळाने दिला आहे.

एसटीच्या थांब्यांवरील उपाहारगृहात अनेकदा जादा रक्कम आकारून खाद्यपदार्थांची विक्री केली जाते, अशा प्रकारचे आरोप मोठ्या प्रमाणावर केले जातात. अशा स्वरूपाच्या तक्रारी प्रवाशांकडून वारंवार होत आहेत. त्यावर नियंत्रण आणण्यासाठी महामंडळाने नवीन तोडगा काढला आहे. त्यामुळे एसटीच्या अधिकृत थांब्याऐवजी अन्य हॉटेल, रेस्तराँमध्ये बस उभ्या करण्याच्या वृत्तीस आळा बसण्याप्र्रमाणेच अधिकृत थांब्यावरील पदार्थांचा दर्जा सुधारण्यास मदत होईल, असा होरा आहे.

त्याचप्रमाणे, उपाहारगृहातील सर्व उपलब्ध खाद्यपदार्थांचे दरपत्रक सुस्पष्टपणे दिसले पाहिजे, असेही एसटी महामंडळाने जारी केलेल्या आदेशात स्पष्ट केले आहे. त्याविषयी प्रवाशांकडून तक्रारी आल्यास उपाहारगृहचालकाचा परवाना रद्द करण्याचीही तरतूद केली आहे.

ही योजना प्रवाशांपर्यंत अजूनही पोहोचली नसल्याने महामंडळाने कंडक्टर वर्गाचे सहाय्य घेतले आहे. सध्या ज्या मार्गांवर ही सेवा उपलब्ध आहे त्या मार्गांवरील सर्व कंडक्टरना एक पत्रक देण्यात आले आहे. त्या पत्रकात खाद्यपदार्थ आणि त्यांचे दर यांची माहिती देण्यात आली आहे. दिवाळीनिमित्त शुक्रवारी आणि शनिवारी प्रवाशांना ही पत्रके सोपवण्याची जबाबदारी कंडक्टर वर्गावर सोपवण्यात आली आहे.

सहापैकी एक पदार्थ निवडा

चहाबरोबर पुरवण्यात येणाऱ्या नाश्त्यात प्रवाशांना सहापैकी एक पदार्थ निवडण्याचा पर्याय देण्यात आला आहे. त्यात, शिरा, पोहे, उपमा, वडापाव, इडली, मेदूवडा यांचा समावेश आहे. या चहा-नाश्ता पर्यायामुळे एसटीच्या प्रवाशांना दर्जेदार खाद्यपदार्थ मिळण्यातील अडथळे दूर होतील, असे मानले जात आहे.