मुंबई
रस्त्याकडेला असलेल्या टपरीवर चहा पिणाऱ्यांना भरधाव टेम्पोने धडक दिल्याने एकाचा मृत्यू झाला तर चार जण जखमी झाले. हा अपघात रविवारी पहाटे बोरिवलीच्या गणपत पाटील नगरमध्ये घडला. रायसाहेब यादव (४५) असे मृत व्यक्तीचे नाव असून याप्रकरणी एम. एच. बी कॉलनी पोलिस ठाण्यात गुन्हा दाखल करण्यात आला आहे.
गणपत पाटील नगरातील गल्ली क्रमांक तीनमध्ये असलेल्या चहाच्या टपरीवर रविवारी पहाटे काहीजण चहा पित होते. यामध्ये बहुतांश रिक्षाचालक होते. पहाटे साडेचारच्या सुमारास एक टेम्पो या ठिकाणी आला. वेगात असल्याने टेम्पोचालकाचे नियंत्रण सुटले आणि हा टेम्पो चहा पिणाऱ्या पाच जणांवर जाऊन धडकला. या अपघातामध्ये जखमी झालेल्या सर्वांना शताब्दी रुग्णालयात दाखल करण्यात आले. गंभीर दुखापत झाल्याने रायसाहेब याचा मृत्यू झाला तर इतर जखमींवर रुग्णालयात उपचार सुरू आहेत. दरम्यान, या अपघातानंतर टेम्पोचालक घटनस्थळावरून पसार झाला.
कारने तिघांना उडविले
रस्ता ओलांडणाऱ्या पादचाऱ्याला वाचविण्याच्या प्रयत्नामध्ये एका कारचालकाने तिघांना उडविल्याचे घटना शनिवारी रात्री ताडदेवच्या हाजीअली जंक्शनवर घडली. सुदैवाने या अपघातामध्ये कुणाचा मृत्यू झाला नाही मात्र तिघे जखमी झाले. याप्रकरणी ताडदेव पोलिसांनी चेंबूर येथे राहणाऱ्या यश गार्गी (२३) याला अटक करून न्यायालयात हजर केले असता त्याची जामिनावर सुटका करण्यात आली.