मुख्याध्यापक पदावरून शिक्षकांमध्ये जुंपली

niraj.pandit@timesgroup.com

@nirajcpanditMT

सध्या शाळांमध्ये मुख्याध्यापक पदावरून चांगलीच रस्सीखेच सुरू आहे. डीएडनंतर बीएड केलेल्या शिक्षकाची सेवा बीएड शिक्षकापेक्षा जास्त झाली असेल, तर तो शिक्षकही मुख्याध्यापक पदासाठी पात्र ठरू शकतो, असा शासन निर्णय काढण्यात आला आहे. यामुळे शाळाशाळांमध्ये सध्या डीएड, बीएड वाद रंगू लागला आहे.

शाळेतील मुख्याध्यापक पदासाठी शासनाने आत्तापर्यंत तीन शासन निर्णय काढले आहेत. या शासन निणर्यांमध्ये समानता नसल्यामुळे सेवाज्येष्ठता यादी कशी तयार करावी, याबाबत संभ्रम निर्माण झाला आहे. शाळांमध्ये बारावी डीएड आणि पदवीधर बीएड अशा प्रकारे दोन गटातील शिक्षकांची नियुक्ती केली जाते. यातील बारावी डीएड हे प्राथमिक विभागाला शिकविण्यासाठी पात्र असतात, तर बीएड शिक्षक माध्यमिक विभागात शिकविण्यास पात्र असतात. या दोघांमध्ये पदवीधर बीएड शिक्षक ज्येष्ठ मानला जातो. आतापर्यंत डीएड शिक्षकाने जास्त कालावधीसाठी सेवा केली असली, तरी बीएड शिक्षकाला मुख्याध्यापक पदासाठी प्राधान्य दिले जात असे. पण ज्या डीएड शिक्षकांना मुख्याध्यापक व्हायचे आहे, त्यांनी सेवा कालावधीत पदवी आणि बीएडचे शिक्षण पूर्ण केल्यास त्यांना प्राधान्य दिले जाईल, तसेच त्यांची जुनी सेवाही गृहित धरली जाईल, असे शासनाने एका निर्णयाद्वारे स्पष्ट केले. तसेच सेवाज्येष्ठता नियमावलीतील नियम क्र.१२ व अनुसुची 'फ'नुसार शाळेतील सर्व शिक्षकांची समायिक यादी तयार करावी, असेही शासनाने सांगितले. पुन्हा या निर्णयात बदल करून इयत्ता सहावी ते आठवीला शिकविणाऱ्या प्रशिक्षित पदवीधर शिक्षकांची सेवाज्येष्ठता यादी स्वतंत्रपणे करावी, असे स्पष्ट केले आहे. यामुळे या दोन याद्या पदोन्नती व पदवीधर वेतनश्रेणीसाठी विचारात घेता येईल का, याबाबत खुलासा करावा, अशी मागणी शिक्षक आमदार नागो गाणार यांनी शिक्षमंत्र्यांकडे केली आहे.