'तेजस' एक्स्प्रेस धावणार 'फाइव्ह डेज अ वीक'

मटा ऑनलाइन वृत्त । मुंबई

ताशी तब्बल २०० किलोमीटर वेगानं धावू शकणारी, देशातील सर्वात वेगवान ट्रेन असं बिरूद मिरवणारी आणि अत्याधुनिक सुविधांनी सज्ज असलेली 'तेजस' आज मुंबईत दाखल झाली असून ती २२ तारखेपासून सीएसटी ते करमाळी (गोवा) दरम्यान धावणार आहे. या सुसज्ज ट्रेनचं वेळापत्रक रेल्वेनं जाहीर केलंय.

पावसाळ्याच्या चार महिन्यांमध्ये आठवड्यातील तीन दिवस, तर अन्य महिन्यांत आठवड्यातील पाच दिवस 'तेजस' ट्रेनने मुंबई-गोवा प्रवास करता येणार आहे.




'तेजस'चे पावसाळ्यातील वेळापत्रकः

>> सोमवार, बुधवार आणि शनिवारी मुंबई सीएसटीहून पहाटे ५ वाजता निघून दुपारी ३.४० वाजता करमाळीला पोहोचेल.

>> बुधवार, गुरुवार आणि रविवारी करमाळी येथून सकाळी ७.३० वाजता निघून संध्याकाळी ७.४५ वाजता मुंबई सीएसटीला पोहोचेल.

नॉन-मॉन्सूनसाठी वेळापत्रकः

>> सोमवार आणि गुरुवार वगळता अन्य पाच दिवस पहाटे पाच वाजता मुंबई सीएसटीहून सुटून दुपारी दीड वाजता करमाळीला पोहोचेल.

>> सोमवार आणि गुरुवार वगळता अन्य पाच दिवस करमाळीहून दुपारी २.३० वाजता निघून रात्री ११ वाजता सीएसटीला पोहोचेल.

'तेजस' या स्थानकांवर थांबणारः

दादर, ठाणे, पनवेल, रत्नागिरी आणि कुडाळ

'तेजस'ची 'लय भारी' वैशिष्ट्ये

- तेजस एक्स्प्रेसची ताशी २०० कि.मी. वेगाने धावण्याची क्षमता आहे. मात्र रूळांची तेवढी क्षमता नसल्याने तूर्त जास्तीत जास्त ताशी १३० कि.मी. वेगाने ही गाडी धावणार आहे.

- मेट्रोप्रमाण दरवाजे असणारी भारतीय रेल्वेच्या ताफ्यातील ही पहिलीच एक्स्प्रेस ठरणार आहे. गाडीला सरकते दरवाजे असतील आणि त्याचं नियंत्रण गार्डकडे असेल.

- विमानाप्रमाणे या गाडीच्या प्रत्येक सीटच्या मागे एलसीडी स्क्रीन लावण्यात आलेला आहे. ज्यावर प्रवासी मनोरंजनात्मक कार्यक्रम पाहू शकतात. गाडीत वायफाय सुविधाही देण्यात आली आहे.

- विमानात बेल दाबल्यानंतर जशी हवाईसुंदरी तुमच्या सेवेत दाखल होते तशाच प्रकारे तुमच्यासाठी या गाडीत अटेंडंट ठेवण्यात आले आहेत.

- शौचालयातही टचलेस नळ आणि बायो व्हॅक्यूम सिस्टीम ठेवण्यात आली आहे.

- गाडीच्या प्रत्येक डब्यात सीसीटीव्ही कॅमेरा, पॅसेंजर इन्फॉर्मेशन सिस्टीम, डेस्टिनेशन बोर्ड लावण्यात आला आहे. पुढचं स्टेशन कुठचं असेल याची माहिती तुम्हाला आधी मिळू शकणार आहे.