पहिल्याच दिवशी 'तेजस'विरोधात तक्रारी

मटा ऑनलाइन वृत्त । मुंबई

भारतीय रेल्वेचा नवीन चेहरा अशी ओळख असणाऱ्या 'तेजस' एक्स्प्रेसचे उद्घाटन सोमवारी मोठ्या थाटामाटात झाले. प्रवाशांच्या उत्सुकतेचा विषय ठरलेल्या या गाडीने आज मुंबई ते करमाळी हा नियमित प्रवास सुरू केला. मात्र, पहिल्याच दिवशी रेल्वे प्रशासनाला अनेक तक्रारींचा सामना करावा लागला. रेल्वेकडून जाहीर करण्यात आलेल्या अनेक सोयी-सुविधा 'तेजस'च्या प्रवाशांना मिळाल्याच नाहीत. त्यामुळं प्रवाशांनी तीव्र नाराजी व्यक्त केली.

संपूर्णतः एसी असणारी ही एक्स्प्रेस सीएसएमटी ते करमाळी या मार्गावर ताशी १३० किमी वेगाने धावणार आहे. विमानासारख्याच सोयीसुविधा 'तेजस'मध्ये देण्यात आल्या असून प्रत्येक आसनामागे एलसीडी स्क्रीन, स्मार्ट स्वच्छतागृह, वायफाय आदींचा समावेश आहे, असं सांगण्यात आलं होतं. मात्र, 'तेजस'मधून पहिला प्रवास करणाऱ्यांना वेगळाच अनुभव आला. करमाळीपर्यंत प्रवास केलेल्या अनेक प्रवाशांनी तक्रारींचा पाढाच वाचून दाखवला.

काय आहेत प्रवाशांच्या तक्रारी?

> गाडीतील आसनांचा दर्जा सुमार आहे.
> गाडीत अकुशल कर्मचाऱ्यांचा भरणा असून ते उद्धटपणे वागतात
> पाणी वेळेवर मिळत नाही, मिळालेच तर थंड मिळत नाही.
> गाडीत डासांचा प्रचंड त्रास
> प्रवाशांच्या तक्रारींकडं कर्मचारी दुर्लक्ष करतात.
> खाद्यपदार्थ मागवूनही वेळेत मिळाले नाहीत
> वायफायची सुविधा नाही
> आवश्यक तितके एसी नाहीत.
> टीव्हीसोबत हेडफोन्स नाहीत.
> पाय ठेवण्याची जागा खडबडीत. इजा होण्याचा धोका.