महिला सक्षमीकरणासाठी ‘टेकफेस्ट’चा पुढाकार

आयआयटीचा पवई कॅम्पस सज्ज

कल्पेशराज कुबल, कॉलेज कल्ब रिपोर्टर

आशिया खंडातील सर्वात मोठा विज्ञान व तंत्रज्ञान फेस्टिव्हल मानला जाणारा आयआयटी मुंबईचा ‘टेकफेस्ट’ पवई येथील भव्य कॅम्पसमध्ये १६ ते १८ डिसेंबरदरम्यान मोठ्या दिमाखात रंगणार आहे. ‘अ स्पेस एक्सपिडिशन’ अशी यंदाच्या फेस्टची थीम आहे. फेस्टमध्ये ‘सक्षम’ या प्रकल्पाअंतर्गत महिला सक्षमीकरणाचा मुद्दा मांडला जाणार असून ‘वुमन इन स्टेम’ या उपक्रमात विज्ञान, तंत्रज्ञान, अभियांत्रिकी आणि गणित आदी विषयात अग्रेसर महिला देशभरातील वीस मुख्य शहरांमध्ये कार्यशाळा घेणार आहेत. ‘महाराष्ट्र टाइम्स’ हा ‘टेकफेस्ट २०१६’चा मीडिया पार्टनर आहे.

आयआयटी मुंबई, ‘टेकफेस्ट २०१६’च्या आयोजनासाठी सज्ज झाली असून यामध्ये देशभरातील विद्यार्थ्यांबरोबर परदेशी विद्यापीठांमध्ये शिकत असलेले विद्यार्थीही सहभागी होणार आहेत. नुकतीच टेकफेस्टची वेबसाइटही प्रसिद्ध करण्यात आली. ‘अ स्पेस एक्सपिडिशन’ ही थीमअंतर्गत यंदाच्या महोत्सवात अंतराळविश्वाशी निगडित पैलूंवर प्रकाश टाकला जाणार आहे.

राष्ट्रीय व आंतरराष्ट्रीय स्तरावरील विद्यार्थ्यांच्या शोध-संशोधनाला जगासमोर मांडण्याची संधी ‘टेकफेस्ट’च्या माध्यमातून विद्यार्थ्यांना दरवर्षी मिळत असते. यंदाही टेकफेस्टमध्ये तज्ज्ञ आणि विद्यार्थ्यांमध्ये ‘मेक इन इंडिया’विषयी विचारमंथन होईल. दरवर्षीप्रमाणे 'रोबोटिक्स' ही स्पर्धा विद्यार्थ्यांसाठी आकर्षणाचा केंद्रबिंदू असणार असून अवकाशात उपयुक्त ठरणाऱ्या रोबोची निर्मिती स्पर्धकांना यामध्ये करायची आहे. ‘गेम ऑफ कोड्स’, ‘रोबोवॉर’, ‘जेनरेक्स’ यांसारख्या स्पर्धादेखील टेकफेस्टमध्ये रंगतील. टेकफेस्टमध्ये विविध सामाजिक उपक्रमदेखील राबविले जाणार आहेत.

अधिक माहितीसाठी www.techfest.org

नोबेलविजेच्या शास्त्रज्ञांशी थेट संवाद

पहिला चंद्रवीर नील आर्मस्ट्राँग यांच्या जन्मदिनानिमित्त, शुक्रवार ५ ऑगस्ट रोजी नोबेल पुरस्कार विजेते शास्त्रज्ञ जॉन मॅथर हे अमेरिकेतून भारतीय विद्यार्थ्यांशी थेट संवाद साधणार आहेत. जॉन मॅथर हे सध्या ‘नासा’मध्ये कार्यरत आहेत. .

मधुमेहाविषयी जागरुकता

मधुमेह या आजाराविषयी जागरूकता निर्माण करण्यासाठी देशभरातील शाळा, कॉलेज, शॉपिंग मॉल यांसारख्या गर्दीच्या ठिकाणी विशेष हेल्थ कॅम्पचे आयोजन केले जाणार आहे. देशभरात एकाच दिवशी २५ सप्टेंबरला आठ तासांमध्ये सर्वाधिक रक्तशर्करा तपासण्या करण्याचा जागतिक विक्रम करण्याचा प्रयत्न केला जाईल.