मुंबईच्या समुद्रात दहशतवाद्यांचा संचार?

suraj.sawant @timesgroup.com
Tweet : @SSawantMT

मुंबई: मुंबईनजिकच्या समुद्रात काही संशयित हालचाली तटरक्षक दलाने हेरल्या असून सर्व तपास यंत्रणांना सतर्कतेचा इशारा देण्यात आला आहे. ‘आयएस’ ही दहशतवादी संघटना यामागे असून या प्रकरणी तटरक्षक दलांनी सोमवारी रात्री तीन दहशतवाद्यांची माहिती तपास यंत्रणांना फॅक्सद्वारे दिली आहे. यापूर्वीही मुंबईच्या समुद्रातून वॉकीटॉकीवर होत असलेल्या अनोळखी संभाषणांची वारंवारता वाढल्याने हा सुरक्षेस असलेला धोका मानून हॅम रेडिओ ग्रुपने त्याची तक्रार सुरक्षा यंत्रणांकडे केली होती.

अरबी समुद्रात गुजरातच्या दिशेने २०० किलोमीटर परिसरात व्हीएचएफ वायरलेस यंत्रणेवर गेले काही महिने संशयास्पद संभाषणे ऐकू येत होती. याबाबतची माहिती हॅम रेडिओ ग्रुपने सैन्यदलापासून पंतप्रधान कार्यालयापर्यंत सगळ्या यंत्रणांना दिली होती. त्यामुळे, समुद्रातून येत असलेल्या आवाजांचा माग काढण्यासाठी यंत्रणा सज्ज झाल्या होत्या. हे संभाषण सांकेतिक भाषेत होत असून या संशयितांना सरकारी सुरक्षा यंत्रणांकडील संभाषण ऐकता येऊ शकते किंवा खंडितही करता येऊ शकते. समुद्रातील संभाषण ऐकून हॅमच्या ऑपरेटर्सनी त्यांच्याशी संपर्क साधण्याचा प्रयत्न केला. मात्र, त्यास त्यांनी दाद दिली नव्हती.

या संशयितांची माहिती किंवा नोंदणी क्रमांक सरकारच्या यादीतही नव्हते. त्यानुसार तटरक्षक दलाने समुद्रात गस्त वाढवली होती. त्याचवेळी सोमवारी वरळी तटरक्षक दल जिल्हा संख्या दोनला समुद्रात काही संशयास्पद हालचाली दिसून आल्या. त्यानंतर तातडीने तटरक्षक दलाने सर्व सुरक्षा यंत्रणांना सतर्क केले. तटरक्षक दलाने ‘आयएस’च्या तीन दहशतवाद्यांची माहिती फॅक्स आणि नियंत्रण कक्षाला दिली आहे. दहशतवादी पुन्हा समुद्रामार्गे हल्ला करण्याची शक्यता नाकारता येत नसल्याने मुंबईच्या समुद्रात गस्त वाढवण्यात आली आहे, असे एका वरिष्ठ अधिकाऱ्याने सांगितले.