म. टा. विशेष प्रतिनिधी, मुंबई
उष्णतेच्या झळा सोसणाऱ्या मुंबईकरांना गुरुवारी सकाळी कोसळलेल्या पावसाने दिलासा दिला. मात्र केवळ दोन तासांच्या पावसाने मुंबईतील वाहतूक सेवेचा मात्र खेळखंडोबा झाला. अनेक भागांत पाणी साचल्याने वाहतुकीतही बदल करावे लागले. बेस्टच्या वाहतुकीलाही त्याचा फटका बसल्याने मुंबईकरांचा प्रवास लांबला. मान्सूनपूर्व पावसातच मुंबईतील सर्व यंत्रणांची कसोटी लागल्याने प्रत्यक्ष मान्सूनचा पाऊस बरसेल, तेव्हा मुंबईची स्थिती काय असेल, याची भीतीदायक झलकच मुंबईकरांना गुरुवारी पाहण्यास मिळाली.
मुंबईकरांची गुरुवारची सकाळ ढगाळलेल्या आभाळाने उजाडली. मुंबईत मान्सून दाखल होण्यास अजून किमान २४ तासांचा अवधी असला तरी गुरुवारी दोन तास कोसळलेल्या पावसातच मुंबईचा वेग मंदावला. शहरातील दादर, परळ, हिंदमाता, वरळी येथे; पूर्व उपनगरात घाटकोपर, विक्रोळी, कुर्ला, चेंबूर येथे तर पश्चिम उपनगरात मालाड, कांदिवली, जोगेश्वरी, वांद्रे या परिसरात पाणी साचले. सायन, किंग्ज सर्कल, हिंदमाता, वांद्रे या भागांतील वाहतूक याच कारणामुळे इतरत्र वळवावी लागली. बेस्टच्या बसेसही अन्यत्र वळवण्यात आल्या. लोटस जंक्शन, हाजीअली जंक्शन, अंधेरी सबवे यठिकाणी वाहतूक धीम्या गतीने सुरू होती. सायंकाळी चारनंतर सर्व ठिकाणची वाहतूक सुरळीत सुरू झाली.
२० झाडे कोसळली : गुरुवारी सकाळी ८ ते सायंकाळी ४ या वेळेत शहरात ७, पूर्व उपनगरात ३ व पश्चिम उपनगरात १० अशी एकूण २० झाडे कोसळली.
रेल्वेही रखडली : मध्य आणि हार्बर रेल्वेमार्गावरील सेवा दुपारपर्यंत सुमारे १५ ते २० मिनिटे उशिराने धावत होती. सायन, माटुंगा, कुर्ला, भायखळा आदी भाग जलमय. हार्बरवर सायन ते चुनाभट्टीदरम्यान रुळ पाण्याखाली.
.......................
नाल्यात बुडून मुलाचा मृत्यू
चेंबूर पूर्वेतील चित्ता कॅम्प येथील नाल्यात दुपारी १.४०च्या सुमारास अरिहंत तांबोळी हा दोनवर्षीय मुलगा बुडाला. अग्निशमन दल, पोलिसांनी बचाव मोहीम हाती घेतली. सुमारे पाऊण तासांनी अरिहंतला बाहेर काढण्यात यश आले. परंतु, त्यास शताब्दी रुग्णालयात आणले असता, त्यापूर्वीच त्याचे निधन झाल्याचे डॉक्टरांनी जाहीर केले.
................
२४ तासांत मान्सून
महाराष्ट्रात येणार
कर्नाटकामध्ये रेंगाळलेला मान्सून गुरुवारी पुढे सरकून गोव्यामध्ये दाखल झाल्याचे हवामान विभागाने जाहीर केले. महाराष्ट्रामध्ये मान्सून दाखल होण्यासाठी अनुकूल वातावरण असून, येत्या २४ तासांमध्ये मान्सून महाराष्ट्राच्या काही भागात दाखल होईल, असा अंदाज आहे. नैऋत्य मान्सूनने प्रगती करत गुरुवारी कर्नाटकच्या किनारपट्टीचा उर्वरित भाग, दक्षिण कर्नाटकचा काही भाग आणि गोव्याचा काही भाग व्यापला आहे.