म. टा. खास प्रतिनिधी, मुंबई
जागतिक एड्स दिनानिमित्त मुंबई जिल्हा एड्स नियंत्रण संस्थेकडून आज मुंबईतल्या विविध रेल्वे स्थानकांवर उपक्रम राबवण्यात आले. मुंबईतील काही रेल्वे स्थानकांवर मोफत एचआयव्ही चाचणी करण्यात येणार असून हा उपक्रम ३ ते ५ डिसेंबर या काळात जिल्हा एड्स नियंत्रण संस्थेद्वारे राबण्यात येणार आहे. 'नो युअर स्टेटस' हे यंदाच्या एड्स दिनाचे सूत्र होते.
इतर वैद्यकीय चाचण्या केल्या जातात; मात्र एड्सच्या चाचण्या करण्यासंदर्भात सर्वसामान्यांच्या मनामध्ये अढी असते. त्यामुळे या चाचण्या पश्चिम व मध्य रेल्वेतील तीन आणि मध्यम रेल्वेतील तीन रेल्वेस्थानकांवर या चाचण्या करण्यात आल्या. सर्वसामान्यांनी एड्स का होतो याची माहिती घ्यावी, तसेच या आजाराबद्दल कोणत्याही प्रकारचे गैरसमज मनामध्ये ठेवू नयेत, हा या तपासणीमागील उद्देश होता. आता रील उपक्रम काळात सीएसएमटी, वांद्रे, दादर, अंधेरी, कुर्ला आणि बोरिवली या सहा रेल्वेस्थानकांवर या चाचण्या मोफत करण्यात येणार आहेत. आजपासून सुरू झालेल्या या वैद्यकीय चाचण्यांचा अहवाल अवघ्या वीस ते पंचवीस मिनिटांमध्ये देण्यात येणार आहे, असे मुंबई जिल्हा एड्स नियंत्रण संस्थेकडून सांगण्यात आले.