एसटीत कापड घोटाळा?

म. टा. प्रतिनिधी, मुंबई: एसटी कर्मचाऱ्यांना गेल्या दोन वर्षांत केवळ एकच गणवेश मिळाला असल्याने तीव्र नाराजी आहे. त्यातच महामंडळात कापड घोटाळा झाला की काय, याविषयी चर्चा सुरू आहे.

एसटी महामंडळ पूर्वी आपल्या कर्मचाऱ्यांना कापड देऊन शिलाई भत्ता देत असे. याचा एकूण खर्च सुमारे १५ कोटी रु. होता. यापैकी सुमारे ७.५० कोटींची कापड खरेदी आणि उर्वरित रक्कम कर्मचाऱ्यांना शिलाई भत्ता म्हणून देण्यात येत असे. मात्र हे बंद करून महामंडळाने थेट शिवून कपडे देण्याचा निर्णय घेतला. यासाठी खासगी कंत्राटदारांशी सुमारे ६४ कोटींचा करार केला. नव्या गणवेशाबाबत अधिकारीच अनभिज्ञ असल्याने महामंडळात कापड घोटाळा झाला की काय, अशी चर्चा अधिकाऱ्यांमध्ये रंगत आहे.

नव्या गणवेशाबाबत मुंबई आणि राज्यातून तक्रारींचा सूर कायम असताना महामंडळाकडून कोणतीही हालचाल होताना दिसत नाही. राज्यातील सर्वच विभागांतील कर्मचाऱ्यांनी एकूण सहा गणवेशांची प्रतीक्षा कायम आहे. याबाबत एसटी महामंडळाच्या जनसंपर्क विभागाशी संपर्क साधला असता, 'नवीन गणवेश वाटप विलंबाबाबत संबंधित अधिकाऱ्यांकडून माहिती घेण्यात येत आहे', अशी माहिती विभागाने दिली.

गणवेश बदलण्याचा निर्णय

एसटी महामंडळात विविध १६ संवर्गांत (वाहक, चालक, फिटर) कर्मचारी काम करतात. त्यांना दरवर्षी गणवेशासाठी महामंडळाकडून कापड दिले जाते; मात्र ते पसंत न पडल्याने अनेक कर्मचारी आपल्या सोयीने कापड खरेदी करून स्वतः गणवेश शिवून घेत. खाकीच्या विविध रंगछटांमुळे एकसारखा गणवेश नसल्याने थेट कापड शिवून देण्याचा निर्णय तत्कालीन परिवहनमंत्री आणि एसटी अध्यक्ष दिवाकर रावते यांनी घेतला.

रिफ्लेक्टरवाला गणवेश

महिला वाहकांसाठी साडी किंवा पंजाबी ड्रेस, कोट असा गणवेश आहे. या ड्रेसला रिफ्लेक्टरही लावण्यात आले आहेत. शिवाय अशाच प्रकारचे रिफ्लेक्टर मेकॅनिकच्या गणवेशालाही लावण्यात आले आहेत. जेणेकरून, जर रात्रीच्या वेळी महामार्गावर बस नादुरुस्त झाली, तर अशा वेळी एसटी जवळ उभ्या असलेल्या चालक, वाहकाच्या ड्रेसवरील रिफ्लेक्टरमुळे इतर वाहनचालकांना याबाबतची माहिती मिळेल. परिणामी संभाव्य अपघाताच्या घटना टळण्यास मदत होणार आहे.