ठाकरे, शिंदेंमध्ये नवा वाद; दोन्ही गटांचा सेम नावावर क्लेम; कुरघोडीच्या राजकारणात कोणाचा गेम?

मुंबई: निवडणूक आयोगानं शिवसेनेचं नाव आणि धनुष्यबाण हे पक्षचिन्ह गोठवण्याचा अंतरिम निर्णय शनिवारी रात्री जाहीर केला. या निर्णयामुळे एकनाथ शिंदे यांच्या बंडानंतर नव्यानं उभारी घेऊ पाहत असलेल्या शिवसेनेला मोठा धक्का बसला आहे. शिवसेनेचं चिन्ह गोठवलं जाणार, हा निर्णय अनेकांना अपेक्षित होता. त्यामुळे फक्त शिवसेनेलाच मोठा धक्का बसेल, असा अंदाज बांधला जात होता. परंतु, निवडणूक आयोगानं आणखी एक पाचर मारून ठेवल्यानं बाळासाहेबांच्या शिवसेनेशी इमान सांगणाऱ्या शिंदे गटाचीही गोची झाली आहे.

शिवसेना नाव वापरता येणार नसल्याचा निर्णय निवडणूक आयोगानं दिला. त्यानंतर दोन्ही गटांनी 'शिवसेना बाळासाहेब ठाकरे' या नावाची मागणी केली. दोन्ही गटांचा एकाच नावावर दावा असेल, तर ते नाव कोणत्याच गटाला दिलं जात नाही. निवडणूक आयोगानं आतापर्यंत अनेकदा अशाप्रकारचे निर्णय घेतले आहेत. त्यामुळे शिंदे आणि ठाकरे गटांना 'शिवसेना बाळासाहेब ठाकरे' नाव मिळण्याची शक्यता धूसर झाली आहे.
चिन्ह गोठलं, शिवसेना नाव वापरता येणार नाही; आता ठाकरे, शिंदेंसमोर काय पर्याय? जाणून घ्या
धनुष्यबाण ही शिवसेनेची ओळख आहे. त्याचप्रमाणे बाळासाहेब ठाकरे हीदेखील शिवसेनेची ओळख आहे. बाळासाहेबांची शिवसेना असा दावा दोन्ही गटांकडून केला जातो. 'शिवसेना बाळासाहेब ठाकरे' असं नाव दिल्यास शिवसेनेच्या मतदारांना थेट कनेक्ट करता येईल, असा दोन्ही गटांचा होरा आहे. त्यामुळेच दोन्ही गटांनी या नावावर दावा सांगितला. मात्र एकाच नावावर दोन्ही गटांनी दावा केल्यास कोणालाच ते नाव दिलं जात नाही अशी उदाहरणं आहेत.
आमचं चिन्ह... मिलिंद नार्वेकरांचं लक्षवेधी ट्विट; धनुष्यबाण गोठवल्यानंतर ठाकरे गटाचं ठरलं?
कोणत्या नावांचा पर्याय?
पक्षाचं नाव आणि निवडणूक चिन्ह गोठवण्यात आल्यानं ठाकरे आणि शिंदे गटासमोर नवं आव्हान निर्माण झालं आहे. दोन्ही गट कोणतं नाव आणि चिन्ह निवडणार याबद्दल राज्याला उत्सुकता आहे. दोन्ही गटांना शिवसेना नाव वापरता येणार नाही. मात्र त्यांना शिवसेनेशी संबंधित नाव वापरता येईल. त्यामुळे शिवसेना (ठाकरे), शिवसेना (शिंदे) अशी नावं घेतली जाऊ शकतात. गेल्या वर्षी लोकजनशक्ती पक्षात फूट पडली. या पक्षाची स्थापना रामविलास पासवान यांनी केली. पासवान यांचे पुत्र चिराग पासवान आणि पासवान यांचे बंधू पशुपती पारस यांच्यामध्ये पक्ष विभागला. त्यावेळी त्यांनी राष्ट्री लोक जनशक्ती पक्ष आणि लोक जनशक्ती पक्ष (रामविलास) अशी नावं घेतली होती.

धनुष्यबाण गोठलं; मग आता कोणतं चिन्हं?
दोन गट एकाच चिन्हावर दावा सांगतात, तेव्हा निवडणूक आयोग ते चिन्हच गोठवतो असा इतिहास आहे. ठाकरे आणि शिंदे गटाला याची कल्पना होती. त्यामुळेच त्यांनी दसरा मेळाव्यातून नव्या चिन्हाबद्दल संकेत दिले. शिंदेंनी बीकेसीमधील मेळाव्याची सुरुवात तलवार पूजनानं केली. व्यासपीठासमोर असलेल्या जागेत ५१ फूट लांब तलवारीची प्रतिकृती ठेवण्यात आली होती. शिंदे गटाच्या आमदारांनी मुख्यमंत्र्यांना १२ फूट लांबीची चांदीची तलवार भेट म्हणून दिली. तर ठाकरे गटानं शिवतीर्थावरील मेळाव्यात शस्त्रपुजनावेळी गदेचा वारंवार उल्लेख केला. त्यामुळे त्यांचं चिन्ह गदा असू शकतं.