त्या’ उड्डाणपुलाचे काम लवकरच

hemant.satam@timesgroup.com

मुंबई : मध्य रेल्वेवरील विद्याविहार स्थानकाकडे उड्डाणपूल उभारण्याची प्रलंबित मागणी अखेरीस पूर्ण होण्याच्या मार्गावर आहे. वाहतूककोंडीपासून विविध समस्यांवर रामबाण उपाय ठरणारा हा पूल उभारण्यासाठी पालिकेने पुढाकार घेतला आहे. या ४५० मीटरच्या पुलाचे काम लवकरच हाती घेण्यात येणार आहे.

हा उड्डाणपूल सोमय्या कॉलेजमधून सुरू होऊन पश्चिमेकडील नौदलाच्या डेपोकडील भिंतीजवळ संपेल. यासाठीचे आरेखन मध्य रेल्वेच्या अधिकाऱ्यांनी संमत केले असून, सहा रुळांवरून हा पूल सरळ एकमेकांना जोडला जाणार आहे. स्टील गर्डरच्या सहाय्याने तयार करण्यात येणारा हा पूल वेगळ्या धाटणीचा ठरणार असल्याचे सांगितले जाते. यासाठी निविदा प्रक्रिया लवकरच सुरू होणार आहे. साधारण जानेवारीमध्ये त्याचे प्रत्यक्ष काम सुरू होण्याचा अंदाज आहे. याठी साधारण १८ महिन्यांचा कालावधी लागणे अपेक्षित आहे. साधारण ५० ते ६० कोटींचा खर्च अपेक्षित असणाऱ्या या पुलाकडे चार मार्गिका ठेवण्यावर भर दिला जाण्याची शक्यता आहे.

घाटकोपर आणि कुर्ला येथे जोडल्या जाणाऱ्या सांताक्रूझ-चेंबूर लिंक रोडमुळे निर्माण होणारी वाहतूककोंडी फोडण्यासाठी हा पूल उपयुक्त ठरणार असल्याचे सांगण्यात येते. त्यामुळे या ठिकाणी लागणारा अर्धा तासाचा कालावधी काही मिनिटांवर येण्याचा दावाही केला जात आहे. विशेष म्हणजे या पुलाची रुंदी १०० मीटरपर्यंत राहणार आहे. शिवाय, हा पूल उभारण्यासाठी रेल्वे रुळांमध्ये एकही खांब रोवले जाणार नाहीत. त्यामुळे हा पूल वेगळ्यापद्धतीने उभारला जाणार आहे.

पुलाची वारंवार मागणी

मुख्य म्हणजे या पट्ट्यातील वाहतूककोंडी फोडण्यासाठी याप्रकारच्या पुलाची आवश्यकता असल्याची मागणी वारंवार करण्यात येत होती. त्याचा फायदा शाळा, कॉलेजच्या विद्यार्थीवर्गासही मोठ्या प्रमाणात होणार आहे. पुलाअभावी अनेकांना वळसा घालून जावे लागते. ही अडचण नव्या पुलामुळे संपुष्टात येणार असल्याचे अधिकारी स्पष्ट करतात.