पोलिसांच्या डोळ्यात धूळ फेकून आरोपींचे पलायन

म. टा. खास प्रतिनिधी, मुंबई

आझाद मैदान येथील मुख्य न्यायदंडाधिकारी न्यायालयातून दोन आरोपींनी सोमवारी अक्षरश: पोलिसांच्या 'डोळ्यात धूळ फेकून' पळ काढला. आझाद मैदान पोलिसांनी तत्काळ मुसळधार पावसात पाठलाग करून पुन्हा दोघांच्याही मुसक्या आवळल्या.

आझाद मैदान पोलिस ठाण्यात मोक्कातंर्गत दाखल गुन्ह्यातील अली अब्बाज खान ( २९) आणि राज शेषराज चौहान उर्फ सुनील (२५) या दोघांना सोमवारी मुख्य न्यायदंडाधिकाऱ्यांसमोर हजर करण्यासाठी आणण्यात आले. न्यायालयात हजर करण्यापूर्वी दोघांनीही लघुशंकासाठी जाण्याची परवानगी मागितली. या दोघांसोबत पोलिसही शौचालयापर्यंत गेले. मात्र बाहेर आल्यानंतर दोन्ही आरोपींनी जवळच असलेल्या कुंडीमधून दोन्ही मुठी भरून माती घेतली. पोलिस पुन्हा पकडणार इतक्यात दोघांनी माती त्यांच्या डोळ्यात फेकली आणि पळ काढला. पोलिसांची मदतीसाठी ओरड ऐकून आझाद मैदान पोलिस ठाण्यातील अधिकारी आणि अंमलदार बाहेर आले. पळालेल्या अब्बाज आणि राज या दोघांचा त्यांनी पाठलाग सुरू केला. पावसात भिजत पोलिसांनी एकाला प्रेस क्लबजवळ पकडले. दुसरा छत्रपती शिवाजी महाराज टर्मिनस स्थानकाहून पळ काढत असताना त्याच्याही मुसक्या आवळल्या. पोलिसांच्या तत्परतेने गंभीर गुन्ह्यातील आरोपी पुन्हा सापडले.