ट्रस्टचा आडमुठेपणा कारणीभूत

पुनर्विकासाला परवानगी नाकारली, रहिवाशांचा आरोप

म. टा. खास प्रतिनिधी, मुंबई

केसरबाई-१ आणि २ या दोन्ही इमारती बाई हिरबाई रहिमभाई अलू पारू अँड बाई केसरबाई धरमसी खाकू चॅरिटेबल ट्रस्टच्या ताब्यात होत्या. या इमारतीमधील रहिवाशांनी दोन-तीन वेळा विकासकांकडून पुनर्विकासाचा प्रयत्न केला, मात्र ट्रस्टने यासाठी परवानगी दिली नाही. ट्रस्टच्या या आडमुठेपणामुळेच निष्पापांचे बळी गेल्याचा आरोप येथील रहिवाशांनी केला आहे.

मी आणि माझे कुटुंब अनेक वर्षांपासून केसरबाई-१ इमारतीमध्ये राहत होतो. दोन-अडीच वर्षांपूर्वी ही इमारत धोकादायक जाहीर केल्यानंतर आम्ही आमच्या अडचणी ट्रस्टकडे मांडल्या. मात्र ट्रस्टने दुर्लक्ष केले. त्यांनी भाडेही देण्यास नकार दिल्यामुळे आम्ही स्वतःच्या खिशातील पैसे खर्च करून दुसरीकडे भाड्याने राहत आहोत.

- नर्गिस मनजी

म्हाडाने इमारत राहण्यायोग्य नसल्याचे जाहीर केल्यामुळे या इमारतीमध्ये कुटुंबाचा जीव धोक्यात घालून राहणे आम्हाला जमले नाही. ट्रस्टही चालढकल करू लागल्याने आम्हीच काटकसर करून भाडे भरून दुसरीकडे राहत आहोत. केसरबाई-१ ही १०० पेक्षा अधिक वर्षे जुनी इमारत आहे, तर केसरबाई-२ ही १९९३ नंतर बांधण्यात आली आहे.

- शाकीरभाई

------------------------------------------------

आठवड्याभरात दुरुस्ती सुरू होणार होती

दोन्ही इमारतीच्या दुरुस्ती आणि पुनर्विकासासाठी अब्दुल सत्तार यांनी पुढाकार घेतला होता. गेल्या आठवड्यात सत्तार यांच्यासह दोन्ही इमारतीमधील रहिवाशांची कंत्राटदारांसोबत बैठक झाली. काही खर्च ट्रस्ट तर उर्वरित रक्कम रहिवासी भरणार होते. मात्र दुरुस्ती सुरू होण्याआधीच इमारत पडल्याचे स्थानिकांनी सांगितले.

मालकांनी दिली भाड्याने

केसरबाई-१ ही इमारत धोकादायक जाहीर केल्यानंतर केसरबाई-२ या इमारतीमध्ये राहणारेही घर खाली करून निघून जाऊ लागले. इतर ठिकाणी भाडे देऊन राहणे परवडत नसल्याने या रहिवाशांनी आपल्या खोल्या भाड्याने दिल्या आणि स्वतः कुटुंबासह इतर ठिकाणी राहत होते. मृतांमधील सलमानी कुटुंब वर्षभरापूर्वीच या ठिकाणी भाड्याने राहण्यास आले होते.

----

कोसळलेली इमारत अनधिकृत

डोंगरी येथील २५/सी केसरबाई ही उपकरप्राप्त इमारत कोसळलेली नसून आजही उभी आहे. ही इमारत वास्तव्यास धोकादायक असल्याने २०१८ मध्ये मंडळाने या इमारतीतील रहिवाशांना व्हेकेशन नोटीस देऊन रिकामी करवून घेतली आहे व सद्यस्थितीत ही इमारत उभी आहे. आज घडलेल्या दुर्घटनेमध्ये २५/सी केसरबाई इमारतीच्या मागील अनधिकृत बांधकामाचा भाग कोसळला आहे. ही अनधिकृत बांधकाम उपकरप्राप्त नसल्याने मुंबई इमारत दुरुस्ती व पुनर्रचना मंडळाच्या कार्यक्षेत्रात येत नाही, असे म्हाडाच्या मुख्य जनसंपर्क अधिकारी वैशाली गडपाले यांनी स्पष्ट केले.