मुंबई व परिसरात मॉर्डनाची लस परदेशातील दुतावासांना देण्यात येतेय?: राष्ट्रवादी

मुंबईः 'देशात फक्त तीनच कंपन्यांना परवानगी असताना फ्रान्समधील नागरीकांना मॉडर्नाची लस देण्याचे काम कुठल्या पध्दतीने सुरू आहे? जर जनतेला परवानगी मिळत नाही मग त्यांना विशेष बाब म्हणून परवानगी दिली का? याचा खुलासा केंद्रसरकारने करावा,' अशी मागणी राष्ट्रवादी काँग्रेसचे राष्ट्रीय प्रवक्ते आणि अल्पसंख्याक मंत्री नवाब मलिक यांनी केली आहे.

'एकीकडे देशात लस तुटवडा असल्याचे केंद्र सरकार सांगतेय. केंद्र सरकारने भारत बायोटेक आणि सिरम इन्स्ट्यिट्यूट व स्फुटनिकला परवानगी दिली आहे. असे असताना या देशात आणि मुंबईच्या आजुबाजुला मॉडर्ना कंपनीच्या लसीचे लसीकरण सुरू आहे,' अशी माहिती उपलब्ध झाल्याचा आरोप नवाब मलिक यांनी केला आहे. सध्याच्या काळात देशातील लोकांना लस मिळत नाही. हा गंभीर प्रश्न असताना हे लसीकरण कसे सुरू आहे आणि या लसीकरणाला विशेष परवानगी देण्यात आली का? असा प्रश्न देखील त्यांनी उपस्थित केला आहे.

'सरकारबद्दल चांगलं लिहिण्यासाठी कलाकारांना सेनाभवनातून पैसे जातात'

'परदेशी दुतावासातल्या विशेषतः फ्रान्समधल्या नागरिकांना मॉडर्नाची लस देण्यासाठी काही हॉस्पिटलमध्ये लसीकरण सुरू करण्यात आलं आहे. दुतावासातील नागरिकांच्या भारतीय नातेवाईकांनाही लसीकरण करण्यात येत,' असेही नवाब मलिक म्हणाले. शिवाय, 'तीनच कंपन्यांना परवानगी असताना मॉडर्नाची लस कशी काय दिली जातेय?,' असा सवालही नवाब मलिक यांनी केला आहे.


महाराष्ट्रातील लॉकडाऊन १ जूनपर्यंत वाढवला; 'हे' आहेत नवीन नियम